''Antalyaspor''un almaniyalı hücumçu Devi Zelke ilə anlaşdığını və keçidin tamamlanmaq üzrə olduğunu xəbər vermişdik. Ancaq bu transferdə son anda işlər qarışdı.

Belə ki, 29 yaşlı futbolçunun həyat yoldaşı Antalyada yox, İstanbulda yaşamaq istədiyini dedi. Bu üzdən Zelke Antalyaya qədər gəlsə də, imza atmadan bu şəhərdən ayrılmalı oldu. Çox keçmədən ona ''İstanbul BŞ''dən rəsmi təklif gəldi. Tərəflər qısa müddət ərzində bütün prinsipial məsələlərdə anlaşma əldə etdilər və bu transfer rəsmən açıqlandı. Başakşəhərlilər təcrübəli hücumçu ilə ''2+1'' illik müqavilə imzaladılar.

Xatırladaq ki, daha öncə ''Verder'', ''Leyptsiq'', ''Herta'', ''Köln''də çıxış etmiş Zelke son olaraq ''Hamburq''da forma geymişdi. O, ötən mövsüm 22 qolla 2-ci bundesliqanın bombardiri olmuş və ''Hamburq''un elitaya yüksəlməsində mühüm rol oynamışdı.

Maraqlıdı ki, 195 sm boya malik olan taran tipli forvard burnundan xəsarət aldığı üçün eynilə Osimhen kimi maskada oynayır.