Bu mövsüm Türkiyə çempionatının bombardirlər yarışında ilk iki pilləni tutan oyunçuların heç biri gələn mövsüm superliqada olmayacaq.

26 qolla bombardir olan Viktor Osimhen zatən ''Qalatasaray''da icarə əsasında oynayırdı və onun Türkiyədə qalmayacağı əvvəlcədən bəlli idi. 21 qolla bombardirlər yarışını ikinci pillədə bitirən Kşiştof Pyontek isə karyerasını Qətərdə davam etdirəcək. Belə ki, təcrübəli polşalı forvard bu ölkənin iddialı klublarından olan ''Əl-Duhail'' ilə üçillik müqavilə imzalayıb. Başakşəhərlilər bu satışdan ciddi gəlir əldə ediblər.

Polşa mətbuatının yazdığına inansaq, transfer 10 milyon avroya reallaşıb! Futbolçunu özü isə illik 4 milyon avroya yaxın pul qazanacaq. Ancaq Pyontekin əvvəlki klubu ''Herta''ya da müəyyən pay çatacaq. Berlinlilər 2023-də Pyonteklə müqaviləni qarşılıqlı şəkildə ləğv edərək onu pulsuz Türkiyəyə buraxarkən sonrakı satışından 20 faiz pay maddəsini müqaviləyə saldırmışdılar. Ona görə də ''Herta''ya bu transferdən 2 milyon avro çatacaq. 29 yaşlı futbolçu Türkiyədə ikinci cavanlığını yaşayaraq iki il ərzində ''İstanbul BŞ''də 84 rəsmi oyuna 48 qol vurdu.

Xüsusilə 2024/25-də o, 31 qol, 5 məhsuldar ötürməlik performans sərgiləyərək karyerasının ən yaxşı mövsümlərindən birini keçirdi.