''Beşiktaş''ın ulduzu Jedson Fernandeş Rusiya klublarının diqqətini cəlb etməkdə davam edir.

Ötən ay ''Zenit''in portuqaliyalı futbolçuya görə İstanbul nəhənginə təklif irəli sürdüyü qeyd olunmuşdu. İndi də ''Spartak''ın adı hallanır.

''Hürriyyət'' nəşrinin yaydığı məlumata görə Moskva nəhəngi ''ağ-qaralar''a 25 milyon avroluq təklif irəli sürüb. Əslində bunu sürpriz xəbər adlandırmaq çətindi. Rusiya nəhənglərinin həm ötən yay, həm də qışda bu futbolçuya ciddi marağı var idi. Hərçənd bu dəfə ''Beşiktaş'' rəsmi şəkildə Fernandeşə görə ''Spartak''dan təklif alması ilə bağlı xəbəri təkzib edib. Klubun rəsmi saytında yerləşdirilən bəyanatda yayılan xəbərlərin tamamilə əsassız olduğu vurğulanılıb.

''Ağ-qaralar''ın Fernandeşi satmamasının əsas) başlıca səbəbi bu futbolçunun haqlarının 50 faizinin ''Benfika''ya məxsus olmasıdı. İstanbul nəhəngi uzun müddətdi, Lissabon nəhəngi ilə bu 50 faizlik payın aradan götürülməsi ilə bağlı danışıqlar aparır. Hətta bunun üçün qarşı tərəfə 3 milyon avro da təklif olunub. Amma ''Benfika'' bu təklifi geri çevirib.

26 yaşlı futbolçunun ötən mövsüm 49 rəsmi oyunda aktivinə 12 qol, 3 məhsuldar ötürmə yazdığını bildirək.