“Mançester Siti” bu cütdə aşkar favorit sayılsa da, “Əl-Hilal” asan rəqib olmadığını hələ qrupda “Real”dan xal almaqla göstərmişdi.

Oyunun əvvəli Xosep Qvardiolanın komandası üçün acı sonluqdan xəbər vermirdi. Artıq 9-cu dəqiqədə Bernardo Silva qapı önündəki qarışılıqdan yararlanaraq topu tora göndərdi. “Siti” “Yuve” ilə oyunda da hesabı məhz 9-cu dəqiqədə açmış və sonradan güclü rəqibi darmadağın etmişdi. İlk yarıda Edersona heç bir iş düşmədi. Amma “Əl-Hilal”ın 2-ci hissənin əvvəllərində yuxudan ayılması ilə oyuna sanki ikinci nəfəs gəldi.

Markos Leonardo ilə Malkomun ardıcıl qolları matçın axarını 180 dərəcə dəyişdi. Düzdü, Səudiyyə Ərəbistanı nəhənginin sevinci çox çəkmədi. Holann künc zərbəsi zamanı önünə düşən topu Bununun ayaqları arasından tora göndərdi. Qalan müddətdə “Siti” böyük üstünlüyə malik olsa da, topu heç cür tora göndərmək mümkün olmadı. Ən real fürsəti 84-cü dəqiqədə Holann əldən verdi. Norveçli qoleadorun yaxşı alınmayan zərbəsindən sonra “Əl-Hilal” müdafiəçiləri topu qapı xəttindən uzaqlaşdırdılar.

Əlavə vaxtın ilk 15 dəqiqəsində tərəflər yenə hərəyə bir qol vurdu. Künc zərbəsi zamanı Kulibali başla fərqləndisə, çox keçmədən Foden çətin vəziyyətdə olmasına baxmayaraq, Bununu məyus etdi. Təcrübəli mərakeşli qapıçı 3 top buraxmasına baxmayaraq oyunu 10 seyvlə tamamladı və komandasının zəfərində mühüm rol oynadı.

Düşünmək olardı ki, bu dramatik oyunda qalib penalti seriyasında müəyyənləşəcək. Ancaq 112-ci dəqiqədə gənc braziliyalı forvard Markos Leonardo yenə səhnəyə çıxdı. Ederson Milinkoviç-Saviçin baş zərbəsini dəf etsə də, “sambaçı” boş qapı önündə özünü itirmədi. Maraqlıdı ki, Ederson bu epizodda oyundakı ilk (!) seyvini etmişdi.

Beləliklə, bu tarixi oyun turnirin əsas favoritlərindən birinin mübarizəni dayandırması ilə nəticələndi. “Əl-Hilal” rəsmi turnirdə Avropa təmsilçisini məğlub edən ilk Asiya klubu kimi tarixə düşdü! Buna qədər bu qitə təmsilçilərinin 20 rəsmi duelindən 18-də avropalılar sevinmişdisə, 2-də bərabərlik qeydə alınmışdı. Qvardiolanın çalışdırdığı klub KDÇ-də 12-ci oyunda ilk dəfə məğlub oldu. Buna qədər təcrübəli məşqçinin komandaları bu turnirdə 11 oyundan 11 qələbə ilə ayrılmış və ümumilikdə cəmi 4 top buraxmışdılar.

Bundan başqa, “Siti”nin 2025-ci ili titulsuz başa vuracağı rəsmən təsdiqini tapdı. Bu klub Qvardiola ilə sonuncu dəfə 2017-ci ili titulsuz tamamlamışdı. Simone İnzaqi isə “İnter”lə bacarmadığını “Əl-Hilal”la bacardı. “İnter” onun başçılığı altında Qvardiolanın “Siti”sinə qarşı həm 2023-də ÇL-in finalında (0:1), həm də ötən il ÇL-in əsas mərhələsində (0:0) qola və qələbəyə həsrət qalmışdı.

1/8 final
Mançester Siti – Əl-Hilal 3:4 (1:0, 1:2, 1:2), əlavə vaxtda
Mançester Siti (İngiltərə): Ederson, Nunyeş (Ake, 53), Diaş, Qvardiol (Akanci, 53), Ait-Nuri, İlkay Gündoğan (Rodri, 53/Foden, 100), Reynders (Şerki, 91), B.Silva, Savinyo, Dokyu, Holann (Marmuş, 91).
Əl-Hilal (Ər-Riyad, Səudiyyə Ərəbistanı): Bunu, Kanselo (Əl-Yami, 88), Kulibali, Əl-Harbi (Əl-Bulayhi, 88), Rodi, R.Neveş, N.Əl-Davsari (Əl-Cuvayr, 106), Kanno (Lacami, 83), Milinkoviç-Saviç, Malkom (Sezar, 64), Leonardo (Əl-Qannam, 116).
Qollar: B.Silva, 9 (1:0). Leonardo, 46 (1:1). Malkom, 52 (1:2). Holann, 55 (2:2). Kulibali, 94 (2:3). Foden, 104 (3:3). Leonardo, 112 (3:4).
Vərəqələr: Qvardiol, 27. Nunyeş, 39. Akanci, 105+1 – sarı.
Hakim: Xesus Valensuela (Venesuela).
1 iyul. Orlando. 42311 tamaşaçı.