Ötən mövsümü 6-cı pillədə başa vuran “Neftçi” heyətini gücləndirməkdədi. “Ağ-qaralar” fransalı vinger İmad Farajla da anlaşıb. Fransanın müxtəlif yaş qrupu yığmalarında oynayan Faraj son üç mövsümdə “AEK Larnaka”da olub, bu komanda ilə Cənubi Kipr kubokunu qazanıb.

Daha çox cinah keçidləri və driblinq bacarığı ilə seçilən, 177 sm boya malik Farajın əsas mövqeyi sağ vinger olsa da, sol vinger və “saxta 9 nömrə” kimi də oynaya bilir. Əlbəttə, bu da əlavə üstünlükdü.

Futbolçu Cənubi Kipr çempionatında meydana çıxdığı 87 oyunda 13 qol, 17 məhsuldar ötürmə ilə yadda qalıb. 26 yaşlı İmadın avrokubok təcrübəsi də var. 8-i qrup mərhələsində olmaqla 14 oyuna çıxıb, bir qol vurub, iki məhsuldar ötürmə verib.

Fransanın U-19 yığması Faraj oynadığı mövsüm elə də uğurlu olmayıb. Avropa səhnəsində adından söz etdirə bilən cəmi iki futbolçu çıxıb - “Bavariya”nın yarımmüdafiəçisi Dayo Upamekano və Bubakar Kamara. Mərakeş əsilli fransız karyerası ərzində “transfermarkt” dəyərinin zirvə nöqtəsindədi.

Hazırda bir milyon dəyəri var və “transfermarkt”a inansaq, “Neftçi” Faraj üçün “AEK Larnaka”ya 700 min avro ödəyib.

MÜZƏFFƏR QULUZADƏ