“Neftçi” yay “transfer pəncərəsi”ndə ikinci transferini reallaşdırıb. Samir Abasovun komandası Luis Ortisi birilliyə icarəyə götürüb.

“Football-plus.az” xəbər verir ki, Ortis öz komandası “Ameliano”ya qışda qatılıb. 167 sm boya malik futbolçu vingerdi. Əsasən sol cinahda oynayan paraqvaylı sağda və mərkəzdə, 10 nömrə mövqeyində də oynaya bilir. İşlək ayağı sağdı. Müasir futbol sol cinahda oynamasını tələb edir. Komandaya qışda qoşulan vinger mümkün 22 oyunun hamısında iştirak edib, üç qol vurub, iki məhsuldar ötürmə verib. Futbolçunun 25 yaşı olsa da, peşəkar karyerasına 2022-ci ildə start verib. Hazırda yüksəliş dövrünü yaşayan Ortisin 350 min avro “transfermarkt” dəyəri var.

Bəstəboy və driblinq sevən olması cinahda “Neftçi”nin köməyinə çata bilər. Amma yaşının 25 olması təcrübəsinin olduğu anlamına gəlmir. 2022-ci ilin yanvarına qədər müxtəlif klubların aşağı yaş komandalarında oynayan Ortisin flaqmana xeyrini görə bilərik. Transferin uzunmüddətli olmaması daha diqqətli davranmaq deməkdi. Həmçinin də icarə əsasında gətirilib. İcarəyə götürülən futbolçu daha ucuz başa gəlir. Əsas odu ki, keyfiyyətli olsun.

Qeyd edək ki, futbolçu karyerasında ilk dəfə legioner həyatı yaşayacaq.

MÜZƏFFƏR QULUZADƏ