“Neftçi”nin baş məşqçisi Samir Abasov klub telekanalına müsahibə verib. “Football-plus.az” həmin müsahibəni təqdim edir.

* İyunun 25-də hazırlığa başlamışıq. Məşqlərin birinci hissəsini keçmişik. Təəccüblənmədim, amma sevindim ki, uzunmüddətli fasilədən sonra futbolçularım xoş təəssürat yaratdılar. Yaxşı vəziyyətdə qayıtmışdılar. Bu da bizə kömək edir ki, qarşıdan gələn yoldaşlıq görüşlərinə hazır olaq.

* Sessi D’Almeydanın klubu ilə müqaviləsi var idi. Onunla çoxdan danışıq aparırdıq. Futbolçu qışdan nəzarətimizdə idi. Şükürlər olsun ki, ilk transferimiz problemsiz gəldi, qoşuldu. Dayaq yarımmüdafiəçisidi. Həddən artıq aqressiv, döyüşkən futbolçudu. Ötən ildən bu barədə problemimiz var idi.

* Luis Ortizi rotasiya üçün heyətə qatmışıq. İcarə əsasında gəlib. Bizə nə qədər uyğun olacaq, nə qədər kömək edəcək - bunları nəzərdən keçirib gələcəkdə həm klubu, həm də özü ilə danışıqlarımız davam edəcək. Öz oynadığı klubda bir neçə mövqedə oynamışdı.

* Legioner limitinin yığışdırılması yerli futbolçulardan imtina edəcəyimiz anlamına gəlmir. Murad Xaçayevlə Elvin Bədəlovu çox yaxşı tanıyıram. Elvin hətta “Sumqayıt”dan əvvəl də burda oynayıb. Sağ olsunlar, dəvətimi qəbul elədilər. Məncə, yerli futbolçular olaraq bizə kömək edəcəklər. Nə qədər uyğunlaşacaqlar, “Neftçi”nin yükünü daşıya biləcəklərsə, bu daha da xeyir verəcək.

* İqor Ribeyronun ən böyük üstünlüyü odu ki, Azərbaycanı tanıyır. Azərbaycan çempionatında yaxşı oynayan futbolçuları transfer etmək tendensiyasına çox klub əl atdı. Biz də Azərbaycan çempionatının ən yaxşı müdafiəçilərindən birini götürmüşük. Özü də “Neftçi”yə gəlməkdə israrlıdı. Çünki “Neftçi” flaqmandı. Əminliklə deyirəm ki, bu müdafiədəki son transferimiz deyil. Çox xoşbəxtəm ki, Ribeyronu heyətimizə qata bildik.

* Transferlərimiz olacaq. Çalışacağıq ki, Polşaya gedənə kimi bir neçə transferi gətirək. Amma bu proseslər çox çətindi. Danışıq apardığımız futbolçuların gəlməməsinin səbəbi əsla bizlə bağlı deyil. Agent və klublarının yaratdığı problemlərdi. Skaut departamentimiz var. Onlar daim işləyir. Mənim nəzarətim altındadı. Gələn transferlərə mən qərar verirəm.

* Hədəflər barədə soruşmaq artıqdı. Bu klubun adı hədəfdi. Yüksək nəticələr uğrunda oynamağı futbolçulara aşılayacağıq. Əlbəttə, çətinlik var. Reallıqları danışsaq, çətindi. Demək olar ki, komandanı yenidən qururuq. Tam fərqli heyət görəcəksiz. Uyğunlaşmaq söhbəti var - həm komandaya, həm də ölkəyə. Öhdəsindən gəlməyə çalışacağıq.

MÜZƏFFƏR QULUZADƏ