Ardıcıl iki mövsüm avrokuboklardan kənarda qalan “Neftçi” artıq çoxdan azarkeşlərinin əsəbini tarıma çəkib. Paytaxt klubu mövsümlərarası dövrdə yalnız bir transfer edib - Sessi D'Almeyda. Komanda ilə yanaşı adı hallanan futbolçular isə Murad Xaçayev, Elvin Bədəlov və Patrik Andradedi.

“Qarabağ”a lazım olmayan, “Sumqayıt”da fərq yarada bilməyən futbolçular “Neftçi”də nə edəcək? Çempionluq mübarizəsi aparmalı olan klub belə transfer siyasəti yürütməlidi?

Samir Abasovun əvvəlki iş yerində bəyəndiyi futbolçuları indiki komandasına gətirmək heç də düzgün yol deyil. Abasov hələ də anlamırmı “Sumqayıt”ın hədəfi, bu komandaya azarkeş təzyiqi başqadı, “Neftçi”də başqa?

Patrik dayaq yarımmüdafiəçisidi, Elvin Camalovun əvəzedicisi ola bilər. İş ondadı ki, komandaya gələn Sessi d'Almeyda da dayaq yarımmüdafiəsi zonasının futbolçusudu. Mövsümün gedişində Tamaş, sonunda Höccət və Matias ilə yollar ayrıldı ki, Muradla Elvin gətirilsin? Höccət Haqverdi “Sumqayıt”da, Azər Salahlı da “Keşlə”də olanda ən az Elvinlə Murad qədər komandaları üçün vacib fiqur idilər. Amma bura “Neftçi”di. Burda tələblər başqadı. Ona görə Azərlər Höccətin bir gəlişi sevindirdi, bir də gedişi.

Bir sözlə, azarkeş səndən başqa transfer gözləyir, flaqman!

MÜZƏFFƏR QULUZADƏ