Sinner köməkçiləri ilə vidalaşdı
Fitnes məşqçisi Marko Paniçi və fizioterapevt Ulises Badio italiyalı tennisçi Yannik Sinnerin komandasını tərk edib.
Xatırladaq ki, dünyanın 1-ci raketkası ötən ilin avqustunda dopinq nümunəsi müsbət nəticələnəndən sonra məşqçi Umberto Ferrara ilə fizioterapevt Cakomo Naldini qovmuş, sentyabrda isə Paniçi və Badio ilə əməkdaşlığa başlamışdı. Paniçi və Badio həmin vaxta qədər “Böyük dəbilqə” turnirlərinin 24 qat qalibi Novak Cokoviçlə çalışmışdı.
Hazırda Sinnerin komandasına məşqçilər Simone Vanyotsi və Darren Kehill daxildi. Osteopat Andre Çipolla da dünən start götürən “Uimbldon” turnirində komandanın tərkibində olacaq.
Sinner Londonda keçiriləcək turnirin startına cəmi üç gün qalmış yuxarıda adı çəkilən mütəxəssislərlə vidalaşmasını belə izah edib:
“Heç bir dramatik hadisə baş verməyib. Sadəcə, Qalledəki turnirdən sonra hiss etdim ki, komandamda dəyişiklik lazımdı. Bu məqam mənə təsir etməyib, oynamağa hazıram. Birlikdə yaxşı çalışdıq, gedənlərə minnətdaram. Belə hesab etdim ki, mənə nəsə başqa bir şey lazımdı. Bütün səbəblət bundan ibarətdi, bunun arxasında başqa heç nə dayanmır”.
Digər xəbərlər
