Sinnerə cəza kəsildi - dünyanın 1-ci raketkası maya qədər oynamayacaq
Ümumdünya Antidopinq Agentliyi (WADA) italiyalı tennisçi Yannik Sinnerin dopinq işinin tənzimlənməsi ilə bağlı razılaşma imzalayıb.
"Football-plus.az" xəbər verir ki, bu haqda qurumun mətbuat xidməti məlumat yayıb. Dünyanın 1-ci raketkası antidopinq qaydalarını pozduğuna görə üçaylıq cəza müddəti ilə razılaşıb.
O, bu il mayın 4-nə qədər korta çıxa bilməz. Əldə olunan razılığı əsas götürən WADA ITIA-in idmançıya bəraət qazandırmaqla bağlı qərarından İdman Arbitraj Məhkəməsinə (CAS) ünvanladığı apellyasiya şikayətini geri çağırıb.
Xatırladaq ki, ötən ilin avqustunda Sinnerin yazda verdiyi dopinq-testin müsbət nəticələndiyi məlum olmuşdu. Amma 23 yaşlı idmançı orqanizmində tapılan klostebol anabolik steroidinə görə bəraət almışdı. O, yasaq maddənin əlcək taxmadan masaj edən fizioterapevtinin ehtiyatsızlığı üzündən orqanizminə düşdüyünü sübut edə bilmişdi.
WADA son razılaşma sənədi ilə bağlı açıqlama yayıb:
“Qurumumuz etiraf edir ki, Yannik Sinnerin antidopinq qaydalarını pozmaq niyyəti olmayıb, o, klostebolla təmasa görə idman nəticələrində üstünlük qazanmayıb. Həmin maddə Sinnerin orqanizminə komandasının üzlərinin ehtiyatsızlığı üzündən düşüb. Ancaq Antidopinq Məcəlləsinə və İdman Arbitraj Məhkəməsinin (CAS) presedentinə uyğun olaraq, idmançı komandasının ehtiyatsızlığına görə məsuliyyət daşıyır. Bu hadisənin unikallığı ilə bağlı şərtləri nəzərə alan WADA üçaylıq diskvalifikasiyanı məqsədəuyğun sayır”.
Digər xəbərlər
