Sinner vətənində qarşısıalınmazdı!
Noyabrın 10-da İtaliyanın Turin şəhərində start götürən ATP-nin illik Yekun turniri srağagün başa çatıb.
Əvvəlcə turnirə iki qrupda mübarizə aparan 8 tennisçinin – Yannin Sinner (İtaliya, 1), Daniil Medvedev (Rusiya, 4), Teylor Frits (ABŞ, 5), Aleks De Minaur (Avstraliya, 9), Aleksandr Zverec (Almaniya, 2), Karlos Alkaras (İspaniya, 3), Kasper Ruud (Norveç, 6) və Andrey Rublevin (Rusiya, 8) qatıldığını xatırladaq. Qrup oyunlarının nəticəsində yarımfinal cütləri formalaşıb:
yarımfinal
Teylor Frits – Aleksandr Zverev 6:3, 3:6, 7:6 (7:3)
Yannik Sinner – Kasper Ruud 6:1, 6:2
Beləliklə, finalda Sinnerlə Frits qarşılaşıb. Onların şəxsi oyunlarında statistika 3:1 Sinnerin xeyrinə idi. Elə final qarşılaşması da italiyalı tennisçinin qələbəsi ilə başa çatdı. Sinner 1986-cı ildən bəri Yekun turnirində bir setdə də uduzmayan ilk tennisçi oldu. 38 il əvvəl İvan Lendl belə nəticə ilə yadda qalmışdı. Yannikin karyerasında ilk dəfə Yekun turnirin qalibi olduğunu da xatırladaq. O, 2023-cü ildə də finala vəsiqə qazanmış, ancaq serb Novak Cokoviçə uduzmuşdu. İtaliyalı bu il 8-ci turnirin qalibi oldu. Onlar arasında “Australian Open” və “US Open” də var.
Final
Yannik Sinner – Teylor Frits 6:4, 6:4
Reaksiyalar
Yannik Sinner:
“Möhtəşəm! İtaliyada qazandığım ilk titul mənim üçün çox şey deməkdi. Xüsusi tituldu. Sadəcə, hər rəqibimə yol tapmağa, ən yaxşı oyunumu göstərməyə çalışdım. Bu turniri çox yüksək səviyyədə keçirdim. Bəzən hətta ideal oynadım ki, buna görə xoşbəxtəm”.
Teylor Frits:
“Sinner möhtəşəm oynadı. Xüsusən də topu oyuna daxil etməsi məni valeh etdi. Mən daha sürətli və cəld olmalıydım. Sinner mənə oynamağa imkan vermədi”.
Digər xəbərlər
