Görünən mənzərə belədi ki, “Zirə” Salifu Sumanı heyətdə saxlaya bilməyəcək. Bunun həm idman, həm də iqtisadi səbəbləri var.

Əlbəttə, Kiyev “Dinamo”su ilə “Zirə”ni tərəzinin eyni gözünə qoymaq olmaz. Həm bu iki klubun maliyyə durumu fərqlidi, həm də çıxış edəcəyi avrokubokun statusu. Odu ki, Konfrans Liqasının təsnifat mərhələsində oynayacaq “Zirə”nin qvineyalı vingerinin xoşbəxtliyi Çempionlar Liqasının 2-ci təsnifat mərhələsindən mübarizəyə qoşulacaq Kiyev “Dinamo”sunda axtarması anlaşılandı. Anlaşılandı, ancaq ideal variant deyil! Bu gün Ukrayna ərazisində dağıdığı müharibə gedir, Rusiya 2022-ci ilin fevralından bəri bu ölkəni işğal etmək üçün dəridən-qabıqdan çıxır. Ukraynada futbol indi heç də ön sıralarda dayanmır. Son mövsümdə faktiki hər turda hansısa oyun dayanır, müəyyən fasilədən sonra bərpa olunurdu. Məhz döyüş əməliyyatları üzündən Ukrayna klublarından ayrılan legionerlərin sayı-hesabı yoxdu. Üstəlik Ukraynanın özündə belə “Dinamo”nun ÇL-in əsas mərhələsində oynayamaq şansı yüksək dəyərləndirilmir, ilk növbədə heyətinə görə. Bax, belə incə məqamları nəzərə alanda Sumanın Kiyev klubunun formasına can atması irəli yox, geri addım atmaqdı.

Sadəcə, futbolla yanaşı, arada pul söhbəti də var. Çox güman, Sumanın başını gicəlləndirən, ağlını qarışdıran da məhz bu məqamdı. Həm də “pul söhbəti” deyərkən mən yalnız adı çəkilən futbolçunun Kiyevdə Zirədəkindən daha çox qazanacağını nəzərdə tutmuram. “Qartallar”ın marağını da unutmayaq. Bir klub “Konyaspor”un 800 min avroluq təklifini rədd edirsə, deməli, gözü göylərdədi, daha yuxarı məbləğ umur, milyonu keçmək istəyir. Əlbəttə, pul şirin şeydi, onun qarşısında əyilməyən adam, klub tapmaq çətindi. Amma “Zirə” bir tərəfdən qazanacaqsa, o biri tərəfdən ciddi itkiyə məruz qalacaq. Bu gün komandanın “Hayduk”la duellərdəki tək-tük şanlarından biri də Sumadı. O biri Rəşad Sadıqov amilidi, bir başqası Xorvatiya klubunun maliyyə problemindən əziyyət çəkməsidi və s. və i.a. Sumanı, yəni son mövsümdəki ən dəyərli iki oyunçudan birini (o biri Davit Volkovdu) əldən vermək “Zirə” üçün özünü bilə-bilə oda atmaqdan başqa bir şey deyil. Sumanın varlığı İssa Cibrilanın da qol-qanad açması deməkdi, iki afrikalı meydanda bir-birini yaxşı anlayır. Qanadın birini kəsəndən sonra o biri nəyə lazımdı?!

Əlbəttə, məni “rəngləri tündləşdirməkdə”, durumu dramatikləşdirməkdə suçlayanlar da tapılacaq. Belələrinin əsas dəlili odu ki, komandaya Brahim Konate və Yeqor Boqomolski kimi yeni legionerlər dəvət olunub, Sadıqov onların potensialını aça, keyfiyyətcə yeni səviyyəyə qaldıra bilər. Bəlkə də “Zirə”nin baş məşqçisi Konatedə bizim görə bilmədiyimiz, fərqinə varmadığımız, hətta Sumanı da unutduracaq hansısa özəllik tapıb. Ya da “Neftçi”də itib-batan Boqomolskinin hansısa fövqəladi hücumçu keyfiyyətləri var. Ola bilər, istisna etmirəm. Amma sənin Suma kimi çoxplanlı oyunçun varsa, həmişə bir addım öndəsən. Qvineyalı əldən çıxsa da, “Zirə”nin “Hayduk” önündə onsuz da yüksək dəyərləndirilməyən şansı bir qədər də azalacaq.
“Qarabağ”ın təcrübəsi avrokuboklarda addım-addım irəliləmək, sonda müntəzəm qruplarda yer almaq baxımından ən parlaq nümunədi.

Çox güman, Rəşad Sadıqov da daha təcrübəli həmkarının – Qurban Qurbanovun yolu ilə getmək istəyir. Əslində onun ilk addımları yaxşıdı. Heyət, nəticələr ilə bağlı müəyyən sabitliyə nail olub. Məntiqlə komanda avrokuboklarda ən azı ötənilki nəticəsini təkrarlamağa çalışmalıdı. Bunun üçün isə Sumanın da heyətdə olması çox vacibdi. Rəqib zəif olsaydı, bəlkə də “qoy “qartallar” milyon qazansın, həmin pula güclü futbolçu ala bilərlər” demək olardı. Ancaq “Zirə”nin bəxtinə Xorvatiya nəhəngi düşüb. Belə məqamda qvineyalı ulduzu da itirmək kamikadzelikdi, məğlubiyyətlə bəribaşdan barışmaqdı.

Axı Sumanı necə saxlamayasan?!

ORXAN