Artıq bir neçə həftədi Brüssel sakinlərinin bəziləri yüksək əhval-ruhiyyədədilər.

"Football-plus.az" xəbər verir ki, “Yunion”un azarkeşləri bir aydan çox müddətdi böyük uğuru qeyd edir, gələcəyə daha coşğulu ümidlərlə baxırlar.

Zarafat deyil, paytaxtın Sen-Jilluaz rayonundan olan komanda 90 (!) illik çemponluq həsrətinə son qoyub! “Yunion” 2022/23 mövsümündə “Brügge”nin çempionluğuna mane ola bilməsə də, bu ilin mayında jüpile liqanı zirvədə başa vurmağı bacardı. Sözün düzü, “göy-sarı”ların çempionluğu qeyri-adi alındı.

Format “Yunion”un işinə yaradı
2024/25 mövsümünün əsas sualına mükafatlar uğrunda mübarizənin lap sonunda cavab tapıldı və bu mərhələdə fantastik hadisə baş verdi. Nəticədə Sebastyan Pokonyolinin çalışdırdığı komanda 12-ci çempionluğuna qovuşdu. Hərçənd “Yunion” 30 turluq müntəzəm çempionatın yekun cədvəlini lider “Genk”dən 13 (!) xal geri qalmaqla 3-cü yerdə başa vurmuşdu.

Bəs necə oldu ki, bir neçə həftə sonra bu qədər fərqi aradan qaldıraraq azarkeşlərinə inanılmaz sevinc bəxş etdi?

Ölkə çempionatının formatı mövsümün həlledici mərhələsində brüssellilərin işinə yaradı. Bu yerdə jüpile liqanın reqlamentinə nəzər salaq. 16 komanda çempionatın birinci mərhələsində ikidövrəli sistemlə mübarizə aparır. Yekun cədvəldə ilk 6 yeri tutanlar növbəti mərhələdə mükafatlar, 7-12-ci yeri tutanlar Konfrans Liqasına vəsiqə, son 4 sırada olanlar isə yüksək liqada qalmaq uğrunda mübarizə aparırlar. İlk iki “6-lıq” həlledici mərhələyə ilk mərhələdəki xalların yarısı ilə başlayırlar. Başqa sözlə, “Yunion” ikinci mərhələ ərəfəsində liderdən 13 deyil, artıq 6 xal geri qalırdı.

Sözsüz ki, xalların ikiyə bölünməsi daha çox 30 oyuna 68 xal qazanan “Genk”ə zərbə vurdu. Yoxsa bu komandanın mövqeyini əldən verəcəyi o qədər də real görünmürdü. Amma brüssellilərin nümunəsində 6 xallıq fərqi “əritmək” ehtimalı təbii ki, artmalı idi.

Belə də oldu. “Göy-sarılar” mükafatlar uğrunda mübarizədə keçirdikləri 10 oyunda məğlubiyyət üzü görmədilər (halbuki ilk mərhələnin 30 oyunundan 5-də uduzmuşdular). Müntəzəm çempionatın ilk dövrəsini 9-cu yerdə başa vuran iddialı komandanın baş məşqçisi postunu itirməli idi. Lakin rəhbərlik Pokonyolini istefaya göndərməyə tələsmədi. Bu isə ikinci dövrədə nəticələrin əhəmiyyətli şəkildə yaxşılaşması ilə müşayiət olundu.

Həlledici mərhələdə isə inanılmaz göstərici qeydə alındı: brüssellilər 9 qələbə qazanıb 1 oyunu heç-heçə başa vurmaqla 30 mümkün xaldan 28-ni hesabına yazdılar. Xüsusilə qeyd edək ki, bu, mükafatlar uğrunda mübarizədə rekord göstəricidi!

Sonuncu turun “Gent” ilə ev oyunundakı 3:1 hesablı qələbə Belçikanın ən titullu üçüncü komandasının qızıl medallara olan 90 illik həsrətinə son qoydu!
Zarafat deyil, “Yunion” Belçika çempionatında əvvəlki zəfərini uzaq 1935-ci ildə qazanmışdı. Prezident Aleks Mutsio növbəti çempionluğu reallaşdırmaq üçün uzun müddət gözləmək lazım gəlməyəcəyinə ümid edir.

Klubun baş direktoru Filipp Bormansın tarixi nailiyyətlə bağlı dedikləri maraqlıdı:

“Genk” böyük şansı əldən verdi
Əlbəttə, brüssellilərin 90 ildən sonra yenidən zirvəyə çıxmasına əsas rəqiblərin mini-turnirdə həddən artıq xal itirməsinin də təsiri oldu. Bu planda “Genk”in geriləməsi diqqəti daha çox cəlb etdi. Birinci mərhələnin lideri əsas izləyicisi “Brügge”ni 9, 3-cü yerdəki “Yunion”u 13 xal qabaqlayırdı. Lakin Torsten Finkin komandası həlledici mərhələdə gözləniləndən az xal qazandı. 4 qələbə qazanıb 1 dəfə heç-heçə edən və 5 oyunda uduzan “Genk” sonda “Yunion”dan 9 xal az toplamaqla mövsümü 3-cü yerdə başa vurdu.

“Brügge” titulu qoruya bilmədi
Bu baxımdan “Brügge” də azarkeşlərini məyus etdi. Əvvəlki çempion müntəzəm çempionatı 2-ci yerdə başa vursa da, titulu qorumaq şansını saxlayırdı. Əksər ekspertlər brüggelilərin şansını yüksək dəyərləndirirdilər. Lakin həlledici mini-turnirdə 24 xal toplayan Niki Hayenin komandası gümüş medallarla kifayətləndi. “Brügge”nin titulu qoruya bilməməsinə təsir edən amillərdən biri kimi Çempionlar Liqasında çox enerji itirməsini göstərmək olar.

Doğrudu, “göy-sarılar” bu turnirdə mübarizəni 1/8 finalda dayandırarkən martın ortaları idi. Başqa sözlə, çempionatın həlledici mərhələsini daha yaxşı keçirmək olardı. Əslində əvvəlki çempionun göstəriciləri heç də pis alınmadı: Hayenin komandası 10 oyunda hesabına 23 xal yazdı. Lakin bu, “Yunion”un rekord nəticəsi qarşısında növbəti çempionluğa şərait yaratmadı. Yeri gəlmişkən, “Yunion”a evdə minimal hesabla uduzan “Brügge” yeni çempionla səfərdə qolsuz heç-heçəyə nail oldu. Nəticədə Belçikanın 19 qat çempionu əsas rəqibindən 3 xal geri qalaraq gümüş mükafatla kifayətləndi.

Vurğulanası faktlardan “Anderlext”in növbəti uğursuzluğunu da qeyd edək. 34 dəfə ölkə çempionu olan brüssellilər bu dəfə də “qızıl”ı təmin edə bilmədilər. Müntəzəm çempionatı 4-cü yerdə başa vuran paytaxt təmsilçisi mükafatlar uğrunda mübarizəni də bu pillədə bitirdi.

Başqa sözlə, çempionluq həsrəti 8 ilə çatdı.