“Şarlott”dakı “Bank of Arena” stadionunda tarix yazıldı. O mənada ki, “Benfika” 10 məğlubiyyət və 3 heç-heçənin ardından, nəhayət, “Bavariya”nı məğlub etməyi bacardı.

Ədalət naminə deyək ki, münhenlilər Şelderupun 13-cü dəqiqədə vurduğu qolun əvəzini çıxmaq üçün əlindən gələni etdi. Xüsusən də 2-ci hissə onların aşkar üstünlüyü şəraitində keçdi. Ancaq “Bavariya” çoxlu qol vəziyyətini boşa verdi. Trubin də qapıda möcüzəvi seyvlər etdi. Epizodların birində Kimmix ukraynalı qapıçını məyus etməyi bacarsa da, Keyn ofsaydda idi. Nəticədə “Benfika” növbəti mərhələyə lider, “Bavariya” qrup ikincisi kimi adladı.

“Oklend Siti” – “Boka Xuniors” oyunu tarixə düşdü. Təbii ki, biz onun turnirin tarixinə fasilə yaranan 5-ci oyun kimi düşməsini nəzərdə tutmuruq. Bəli, 56-cı dəqiqədə, yəni Qreyin bərabərlik qolundan az sonra qasırğa təhlükəsi ilə komandalar paltardəyişmə otağına yollandı. 45 dəqiqə sonra canlanan oyunda daha qol vurulmadı. Amma Qreyin – bədən tərbiyəsi müəlliminin bərabərlik qoluna xüsusi toxunmağa dəyər.

Turnirin reqlamentinə görə, qrup mərhələsindəki hər heç-heçə komandaya 1 milyon dollar qazandırır. Bu komandanın oyunçularının hər həftə orta hesabla 84 avro qazandığını nəzərə alsaq, inanılmaz puldu. Ümumiyyətlə, “Oklend Siti” turnirdə iştiraka görə nəzərdə tutulan bonusla birgə 4,6 milyon qazanıb ki, bu da klubun 7 illik büdcəsinin təmin olunması deməkdi!

C qrupu, 3-cü tur
Benfika – Bavariya 1:0 (1:0)
Benfika (Lissabon, Portuqaliya): Trubin, Eursnes, A.Silva, Otamendi, Dal, Sançeş (Bayrami, 78), Barreyro, Di Mariya (Reqo, 87), Prestianni (Kökçü, 54), Şelderup (Aktürkoğlu, 54), Pavlidis (Qoveya, 87).
Bavariya (Münhen, Almaniya): Noyer, Bue (Laymer, 62), Upamekano (Ta, 58), Stanişiç, Gerreyro, Palyinya (Kimmix, 46), Pavloviç, Sane, Bişof (Keyn, 46), Qnabri (Olise, 46), Müller.
Qol: Şelderup, 13.
Vərəqələr: Sançeş, 19. Otamendi, 46. Qoveya, 89 – sarı.
Hakim: Fransua Letesye (Fransa).
24 iyun. Şarlott. 33287 tamaşaçı.

Oklend Siti - Boka Xuniors 1:1 (0:1)
Oklend Siti (Yeni Zelandiya): Gerrou, Laqos (Li, 83), Boksall, Mitçell, Qrey, Murati (Veyl, 54), Manikum (Zeb, 68), İliç, Qarriqa (Konnolli, 54), Yu (Ellis, 54), Bevan.
Boka Xuniors (Buenos Ayres, Argentina): Marçesin, Blanko, Pelleqrino, Di Lollo, Advinkula, Palasios, Battalya, Velasko (Brayda, 54), Merentiel, Kavani (Ximenes, 54), Sebalyos (Senon, 26).
Qollar: Gerrou, 26-öz qapısına (0:1). Qrey, 52 (1:1).
Vərəqə: yoxdu.
Hakim: Qlenn Nüberq (İsveç).
24 iyun. Neşvill. 16899 tamaşaçı.

1. Benfika 3 2 1 0 9-2 7
2. Bavariya 3 2 0 1 12-2 6
3. Boka Xuniors 3 0 2 1 4-5 2
4. Oklend Siti 3 0 1 2 1-17 1