C qrupunda 2-ci turun oyununda “Bavariya” “Boka Xuniors”un öhdəsindən çətinliklə gəldi – 2:1.

"Football-plus.az" xəbər verir ki, ilk yarıda komandalar arasında səviyyə fərqi açıq-aşkar görünürdü. Olisenin vurduğu “quru yarpaq” Qnabrinin qapıçıya hücumu üzündən sayılmadısa, 10 dəqiqə sonra münhenlilər istəyinə nail oldu.

“Oklend”lə oyunda susan Keyn Laymerin ötürməsindən sonra turnirdə qol hesabını açdı. Ardından Koman da fərqlənməyə borclu idi, ancaq dəqiq zərbə vura bilmədi. Yalnız bundan sonra argentinalılar silkələndi. Onlar hətta Noyerin qoruduğu qapıya iki zərbə də vurdular. Qapıçı Zenonun zərbələri zamanı etibarlı oynadı. “Bavariya”dan isə Olise və Keyn fərqlənmək imkanını qaçırdı. 2-ci hissənin ortalarında “Boka Xuniors” almanları cəzalandırdı. Ta ilə Stanişiçi işsiz qoyan Merentiel topu Noyerin əlinin altından qapıya göndərdi. Amma argentinalılar heç-heçəni qoruya bilmədi. 84-cü dəqiqədə Olise Keynin ötürməsindən sonra qapının uzaq aşağı küncünü dəqiq “nişan aldı”. “Bavariya” daha bir neçə dəfə fərqlənə bilərdi. Bununla belə, tabloda hesab bir daha dəyişmədi. “Flamenqo”nun ardından Vensan Kompaninin də komandası pley-offa adladı. “Boka Xuniors” isə son turda “Oklend Siti” üzərində böyükhesablı qələbə qazanmaqla yanaşı, “Benfika”nın büdrəməsinə də bel bağlamalıdı.

Yeri gəlmişkən, Mayamidə keçirilən “Bavariya” – “Boka Xuniors” oyununu 63587 tamaşaçı izlədi ki, bu da turnirdə üçüncü göstəricidi. Yalnız PSJ – “Atletiko” (80619), “Real” – “Paçuka” (70248) oyunlarında stadionda daha çox tamaşaçı olub. Azarkeş sayı baxımından 4-cü yerdə “Real” – “Əl-Hilal” (62415), 5-ci yerdə isə “Əl-Əhli” - “İnter Mayami” (60927) oyunu qərarlaşıb.

2-ci turun digər oyununda “Benfika” “Oklend Siti”ni darmadağın etdi. Di Mariya ilk yarının sonunda hesabı açandan sonra oyun dayandı. Əlbəttə, bunun günahkarı argentinalı ulduz deyildi. Sadəcə, hava şəraitinə görə komandalar iki saat gözləməli oldu. Oyun canlanandan sonra Portuqaliya nəhəngi daha 5 qol vurdu. Di Mariya turnirdə yerinə yetirdiyi 3-cü penaltini də qola çevirdi, Barreyro dubl etdi, Pavlidis və Sançeş də adını tabloya yazdırdı.

Bu oyunda daha bir məqam diqqəti çəkdi. Yığmamızın formasını geyən Ocanzan Kökçünün kiçik qardaşı Orkun münaqişə yaratdı. 61-ci dəqiqədə artıq 2:0 öndə olan “Benfika”nın baş məşqçisi Bruno Laje Orkunu Sançeşlə əvəzləməyə qərar verdi. Türk əsilli xavbek buna çox pis reaksiya göstərdi: üzünü ehtiyat oyunçular skamyasına tərəf tutub söydü, hətta meydandan çıxandan sonra da mübahisəni davam etdirdi. Kökçü Lajeyə qışqırır, baş məşqçi onu sakitləşdirməyə çalışırdı. Təbii ki, bu epizod kameraların “gözündən qaçmadı” və indi fanatlar nəticə ilə yanaşı, Orkunun davranışını da müzakirə edir. Görünür, “Benfika”da komandadaxili durum idealdan çox uzaqdı.

C qrupu, 2-ci tur
Bavariya – Boka Xuniors 2:1 (1:0)
Bavariya (Münhen, Almaniya): Noyer, Gerreyro (Upamekano, 67), Stanişiç, Ta, Laymer, Qoretska (Musiala, 57/Müller, 82), Kimmix, Koman (Sane, 67), Qnabri (Pavloviç, 57), Olise, Keyn.
Boka Xuniors (Buenos Ayres, Argentina): Marçesin, Blanko, Kosta, Di Lollo, Advinkula, Belmonte (Alarkon, 69), Battalya, Velasko (Saraççi, 80), Palasios (Ximenes, 69), Senon (Brayda, 59), Merentiel (Sebalyos, 80).
Qollar: Keyn, 18 (1:0). Merentiel, 66 (1:1). Olise, 84 (2:1).
Vərəqələr: Roxo, 15 (meydandan kənarda). Advinkula, 36. Qoretska, 45+3. Di Lollo, 71 – sarı.
Hakim: Əlirza Feqani (İran).
20 iyun. Maqami. 63587 tamaşaçı.

Benfika – Oklend Siti 6:0 (1:0)
Benfika (Lissabon, Portuqaliya): Trubin, Karreras (Dal, 46), Otamendi, A.Silva (Bayrami, 86), Barreyro, Kökçü (Sançeş, 61), Eursnes (Reqo, 71), Aktürkoğlu (Şelderup, 61), Prestianni (Qoveya, 71), Di Mariya, Pavlidis.
Oklend Siti (Yeni Zelandiya): Gerrou, Bell, Boksall, Den Hayer (Qrey, 80), Mitçell, Laqos, İliç (Manuel, 59), Çji Tun (Qarriqa, 46), Zeb (Manikum, 59), Bevan (De Vris, 73), Yu (Ellis, 59).
Qollar: Di Mariya, 45+8-p. (1:0). Pavlidis, 54 (2:0). Sançeş, 63 (3:0). Barrreyro, 76 (4:0). Barreyro, 78 (5:0). Di Mariya, 90+8-p. (6:0).
Vərəqələr: Karreras, 45+4. Kökçü, 48. Bayrami, 87 – sarı.
Hakim: Salman Flahi (Qətər).
20 iyun. Orlando. 6730 tamaşaçı.

1. Bavariya 2 2 0 0 12-1 6
2. Benfika 2 1 1 0 8-2 4
3. Boka Xuniors 2 0 1 1 3-4 1
4. Oklend Siti 2 0 0 2 0-16 0

Növbəti turun oyunları bu gün keçiriləcək: Benfika – Bavariya, Oklend Siti - Boka Xuniors.