Çempionluq həsrəti 14 ilə çatan “Fənərbaxça”, bilindiyi kimi, yeni mövsümə də Joze Mourinyo ilə start vermək qərarına gəlib.

"Football-plus.az"ın məlumtına görə, İstanbul nəhəngi yeni “futbol ili”nin hazırlığına iyulun 8-də start verəcək. Daha sonra “Fənər”i Portuqaliya toplanışı gözləyir. Komanda Mourinyonun doğulduğu Setubal şəhərindən cəmi 25 km məsafədə yerləşən Albufeyra şəhərində ikihəftəlik toplanış keçəcək. İyulun 14-27-ni əhatə edəcək bu toplanış çərçivəsində “sarı-lacivərdlilər” iyulun 17-də “Portimonense”, 20-də “Sanderlend”, 23-də “Əl-İttihad” ilə qarşılaşacaq.

İyulun 26-da “Eysebio kuboku” çərçivəsində “Benfika” ilə keçirilməli olan oyunun baş tutub-tutmayacağı hələ də bəlli deyil. Çünki bu komandaların Çempionlar Liqasının təsnifatında bir-birinə rəqib olmaq ehtimalı var. İddialara görə Mourinyo icarədən qayıdanlar da daxil olmaqla bütün futbolçuların hazırlığın əvvəlində iştirak etməsini istəyir. O hazırlıq planını, məşqlərin axarını indidən hazırlayıb və bütün oyunçuların durumunu öz gözü ilə görmək istəyir. Hələ ki Ceko, Tadiç, Kostiç, Sen-Maksimen və Osayi-Samueldən başqa heç kimlə vidalaşmayan “Fənər”də futbolçuları çox ağır bir hazırlıq dönəmi gözləyəcək. Mourinyo məşqdə futbolçuların dözümlülüyünü, fiziki yetərliliyini və fərdi performansını artırmağa çalışacaq. Oyunçuların yağ və çəki ölçüləri gündəlik nəzarətdə saxlanılacaq. Lazım gələndə hər futbolçu üçün ayrıca məşq proqramı hazırlanacaq.

Türkiyə mətbuatının yazdığına inansaq, Portuqaliya toplanışı kluba, demək olar, tam havayı başa gələcək. Əksinə, yoxlama matçlarında müəyyən gəlir əldə olunacaq. Mourinyo məhz Portuqaliyada futbolçuların bir-biri ilə olan əlaqələrini və komandada psixoloji durumu yaxşılaşdırmağa çalışacaq. Belə ki, oyunçular məşqlərdən əlavə masa tennisi, çimərlik voleybolu, stolüstü oyunlarda özünü sınaya biləcək. Axşamlar futbolçular birlikdə filmə baxacaq və barbekü məclisləri təşkil olunacaq. Ötən mövsümün xüsusilə ikinci dövrəsində “Fənərbaxça”nın daxilində ab-havanın yaxşı olmadığı, futbolçular arasında qruplaşmalar yarandığı hiss edilmişdi. Tadiçlə Talişkanın az qala əlbəyaxa olması bunun ən gözəl nümunəsi idi.

Mourinyo hər nə qədər bütün futbolçuları sınaqdan keçirmək istəsə də, icarədən qayıdan bəzi isimlərin komandada qalmayacağını indidən əminliklə söyləmək olar. Məsələn, ötən mövsümü uyğun olaraq, “Tuluza” və “Hall Siti”də keçirən Linkoln Enrike ilə Miha Zayts portuqaliyalının planlarına daxil deyil. Rəhbərlik onların ayrılmasına problem yaratmayacaq. Bu arada komandada 3-cü qapıçının dəyişəcəyi bəlli olub. Belə ki, bu statusda olan 22 yaşlı Əruğrul Çətinlə yollar ayrılacaq. Yeni mövsümdə 3-cü qapıçı rolunu U-19 komandasının əlcək sahibi Engin Can Biterge yerinə yetirəcək. ABŞ-da çox qalmayan və komandaya dönən Cengiz Ündəri sabiq klubu “İstanbul BŞ” istəyir. Mourinyo onun ayrılmasında problem görmür. Amma təcrübəli məşqçi İsmayıl Yüksəkin ayrılmasını istəmir. Türkiyə yığmasının üzvü yeni mövsümdə də az oynayacağı təqdirdə “Fənər”də qalmaq niyyətində deyil. Komandanın ən az qazanan oyunçularından olan və illik cəmi 15 min avro maaşa oynayan Yusuf Akçiçəklə tezliklə yeni müqavilə imzalanacaq. Avropanın bir çox klubunun hədəfində olan gənc müdafiəçinin maaşı 850 min avroya qaldırılacaq.