“Qalatasaray”ın göz bəbəyi Mauro İkardi yenə də şəxsi həyatı ilə gündəmdədi.

Düşünmək olardı ki, qalmaqallı həyat yoldaşı Vanda Naradan ayrılandan və köhnə sevgililərindən biri olan Çayna Suares ilə eşq yaşamağa başlayandan sonra argentinalı forvardın həyatı belə desək, qaydasına düşəcək. Amma son günlərdə Argentinadan tam fərqli xəbərlər gəlməkdədi.

Bu ölkədə işıq üzü görə “El Esqiui” nəşrinin son sayında İkardi ilə Suaresin münasibətlərinin pozulmasına dair yeni xəbər dərc olunub. İkilinin bugünlərdə çox güclü bir münaqişə yaşadığı məlum olub.

Onların arasındakı problemin iki əsas səbəbi var. Birinci səbəb odu ki, tanınmış futbolçunun Vanda Naradan olan qızları Çayna Suares ilə birlikdə yaşamaq istəmir. İkinci səbəb isə onların birlikdə Türkiyəyə qayıtmaq və bu ölkədə yaşamaq mövzusunda fikir ayrılığı yaşamalarıdı.

Daha öncə qeyd olunurdu ki, Suares artıq Türkiyədən iş təklifləri alıb və İkardi ilə birlikdə bu ölkədə yaşamağa hazırdı. Aktrisa və model kimi fəaliyyət göstərən Suares reklam və digər çəkilişlərdə iştirak edir. Amma aralarında soyuqluq yarandığından onun artıq Argentinadakı iş-gücünü atıb İkardi ilə birlikdə Türkiyəyə gəlmək fikrinə isti yanaşmadığı məlum olub.

Suaresin qızı otüstü hokkeylə məşğul olur. “İnfobae”nin məlumatına görə srağagün bu ikili Suaresin qızının oyununda görüntülənib. Onların bir-birinə qarşı çox soyuq davranması, gülümsəməməsi və xoşbəxt görünməməsi diqqəti çəkib.

İddialara görə, İkardi daha öncə Çayna Suares üzərindən İstanbuldakı həyatla bağlı qurduğu planların hamısını təxirə salıb. Bütün bu söz-söhbətin ardından ikilinin münasibətlərinin necə davam edəcəyi və İkardinin Türkiyəyə təkbaşına gəlib-gəlməyəcəyi maraq doğurur.

Xatırladaq ki, bu cütlük həm də bir müddət öncə nişanlanmışdı.