AFFA İcraiyyə Komitəsinin üzvü Qurban Qurbanov bu qurumun iyunun 25-də keçirilən iclasında da iştirak etməyib.

Səbəbi məlumdu: həmin gün “Qarabağ” Qarabağı gəzib-dolaşıb. Amma məlum məsələdi ki, həm səfər, həm də iclas əvvəldən planlaşdırılır. Qurbanov da hər iki tərəf üçün vacib fiqur olduğuna görə ya səfərin, ya da iclasın vaxtı dəyişdirilə bilərdi.

Dəyişdirilməyibsə, deməli, elə belə məsləhətdi. Onu da nəzərə alaq ki, bu ilk belə hal deyil.

“Qarabağ”ın baş məşqçisi AFFA İcraiyyə Komitəsinin son üç iclasında iştirak etməyib. Martın 14-ü və aprelin 11-i keçirilən iclaslarda da olmayıb. Hər birinin səbəbi kimi “Qarabağ” göstərilib. Oyuna hazırlaşmaq və s. və i.a. Aydın məsələdi, Qurbanov “Qarabağ”ın baş məşqçisidi, komandanın, klubun ən vacib simasıdı. Amma onun yanında bir neçə köməkçi var. Qurban bəy işə məsuliyyətli yanaşan adamdı, buna heç kimin şübhəsi yoxdu. Amma AFFA İcraiyyə Komitəsinin üzvü olmaq, ölkə futbolunun taleyi ilə bağlı önəmli məsələlərin müzakirəsinə qatılmaq da onun işidi.

Qurban Qurbanov bu komitəyə gələndə hər kəs sevinmişdi ki, futbolun içində, problemlərindən xəbərdar olan insan da o iclaslarda iştirak edəcək, qərar verənlərdən olacaq. Amma ardıcıl üçüncü iclasa qatılmağı lazım bilmir. Deməli...

MÜZƏFFƏR QULUZADƏ