“Futbol+”in şənbə sayında öz qaynaqlarımıza istinadla bu həftə AFFA İcraiyyə Komitəsinin iclasının keçiriləcəyini xəbər vermişdik.

AFFA-nın saytı bir neçə dəqiqə əvvəl bu xəbəri təsdiqlədi:

“Aprelin 13-də AFFA-nın inzibati binasında İcraiyyə Komitəsinin növbəti iclası keçiriləcək. Saat 10.00-da başlayacaq iclasın gündəliyini diqqətinizə çatdırırıq: 1. Azərbaycan milli komandasının Avro-2024-ün seçmə mərhələsi çərçivəsində keçirdiyi oyunlarla bağlı baş məşqçi Canni De Byazinin İcraiyyə Komitəsinə hesabatı. 2. Digər məsələlər”.

Bizdə olan bilgiyə görə, yığmanın baş məşqçisinin istefaya göndərilib-göndərilməyəcəyi ilə bağlı bu an üçün qətiləşmiş mövqe yoxdu. İcraiyyə Komitəsinin üzvləri arasında hər iki variantın tərəfdarları var. Və aprelin 13-nə, nəhs günə özəllik qatan daha bir məqamı unutmaq olmaz: 15 ilə yaxındı “Qarabağ”ın “sükanı arxasında” olan, komandasını 9 dəfə avrokubokların qrupuna daşıyan Qurban Qurbanov məhz çərşənbə günü 51 yaşını tamamlayacaq. Nə qəribə təsadüf! Bəlkə adama adına layiq bir doğum günü hədiyyəsi verəsiz?!

ORXAN