İlk turda ən az (1) qol məhz bu qrupda vurulmuşdusa, 2-ci turda ən maraqlı və məhsuldar oyunlar bu qrupa təsadüf etdi.

"Football-plus.az" xəbər verir ki, “Fluminense” ilə qarşılaşmada ümidləri doğrultmayan Dortmund “Borussiya”sının 2-ci turdakı oyunu gözlənilmədən çox məhsuldar alındı. Formasının rənginə görə braziliyalılara bənzədilən “Mamelodi Sandaunz” meydanda da braziliyalılara xas hücumameyilli futbol sərgilədi. Rəqibin ad-sanından çəkinməyən Afrika təmsilçisi ilk dəqiqələrdən irəli atılaraq hesabda önə keçməyə də müvəffəq oldu. Amma oyun irəlilədikcə səviyyə fərqi özünü göstərməyə başladı.

“Arılar” fasiləyə kimi geridönüşü artıqlamasıyla həyata keçirərək 3 qol vurdular. Özü də qollardan birini komandanın yeni transferi, “Real”ın ulduzu Cud Bellingemin qardaşı Cob vurdu. 60-cı dəqiqədə gələn avtoqoldan sonra fərq hətta darmadağın həddinə çatdı. Düzdü, “Mamelodi” qalan müddətdə iki qol vuraraq fərqi minimuma endirməyə müvəffəq oldu. Amma xal qazanmaq mümkün olmadı.

Qrupun digər oyununda da favorit sayılan komanda hesabda geri düşdüyü üçün əzmkarlıq nümayiş etdirmək məcburiyyətində qaldı. İlk yarının ortalarında hesabda geri düşəm “Ulsan” gözlənilmədən fasilə ərəfəsində iki qol vuraraq “Fluminense”yə əsl şok yaşatdı. Amma 2024-cü ildə Libertadores kubokunun qalibi olmuş Rio de Janeyro təmsilçisi fasilədən sonra 3 top vuraraq rəqibi “ağ bayraq qaldırmağa” məcbur etdi. “Borussiya”ya pley-offa vəsiqəni rəsmiləşdirmək üçün son turda “Ulsan”a uduzmamaq kifayət edəcək. “Mamelodi Sandaunz”un isə taleyi hələ də öz əlindədi. Afrikalılar “Fluminense”ni məğlub edəcəyi təqdirdə pley-offa yüksələcəklər.

F qrupu, 2-ci tur
Mamelodi Sandaunz – Borussiya D 3:4 (1:3)
Mamelodi Sandaunz (Pretoriya, Cənubi Afrika): Uillyams, Mudau, Kekana, Kupido, Lunqa, Mokoena (Seyls, 70), Zvane (Letlaku, 86), Allende, Ribeyro (Morena, 70), Mettyus (Adams, 70), Rayners (Motiba, 77).
Borussiya (Dortmund, Almaniya): Kobel, Kouto, Zyule (Ryuyerson, 83), Anton, Bensebayni, Svensson, Nmeça (Zabitser, 62), Qross, Cob Bellingem (Bayer, 83), Brandt (Çukvuemeka, 62), Girassi (Adeyemi, 90).
Qollar: Ribeyro, 11 (1:0). Nmeça, 16 (1:1). Girassi, 34 (1:2). C.Bellingem, 45 (1:3). Mudau, 60-öz qapısına (1:4). Rayners, 62 (2:4). Motiba, 90 (3:4).
Vərəqələr: Çukvuemeka, 64. Mettyus, 68. Bayer, 85. Allende, 90+5 – sarı.
Hakim: Xuan Qabriel Benites (Paraqvay).
21 iyun. Sinsinnati. 14006 tamaşaçı.

Fluminense – Ulsan 4:2 (1:2)
Fluminense (Rio de Janeyro, Braziliya): Fabio, Quqa (Şavyer, 85), Tyaqo Silva, Freytes, Fuentes, Erkules, Martinelli (Nonato, 59), Arias, Qanso (Everaldo, 46)), Serna (Keno, 59), Kano (Bernal, 85).
Ulsan (Koreya): Co Hyunvo, Kan San Vu (Çoy Seok Hyun, 63), Troyak, Kim Yon Qvon, Li Ce İk (Yun Vu Yon, 84), Lüdviqson, Ko Sun Bom (Yul Heo, 84), Boyaniç (Li Çun Yon, 84), Li Cin Hyun, Farias, Von San Um (Lakava, 74).
Qollar: Arias, 27 (1:0). Li Cin Hyun, 37 (1:1). Von San Um, 45+3 (1:2). Nonato, 66 (2:2). Freytes, 83 (3:2). Keno, 90+2 (4:2).
Vərəqə: Keno, 90+5 – sarı.
Hakim: Maykl Oliver (İngiltərə).
21 iyun. Nyu Cersi. 29321 tamaşaçı.

1. Fluminense 2 1 1 0 4-2 4
2. Borussiya D 2 1 1 0 4-3 4
3. Mamelodi Sandaunz 2 1 0 1 4-4 3
4. Ulsan 2 0 0 2 2-5 0