Ötən gün “Qarabağ”ın Qarabağa səfərində idman jurnalistlərinin olmaması bu sahədə çalışanlarda qıcıq, narazılıq, təəccüb doğurdu. Axı bu ideya klub rəhbərliyinin idman jurnalistləri ilə mövsümsonu görüşündə qabardılmışdı, amma səfər baş tutdu, bizlər unudulduq.

Dünəndən sosial şəbəkələrdə “Qarabağ”ın məhz özünə yaxın olan jurnalistləri aparması ilə bağlı narazılıqlar da var. Məsələni aydınlaşdırarkən məlum oldu ki...

Bu səfərin iki təşkilatçısı var - “Qarabağ”, bir də Gənclər və İdman Nazirliyi. “Football-plus.az”ın əldə etdiyi məlumata görə, futbolçuların, klub personalının siyahısını “Qarabağ” təqdim etsə də, jurnalistlərin siyahısını AGİN hazırlayıb. Bu nazirliyin siyahıları isə həmişə olduğu kimi yenə qərəz, kin-küdurət və ayrı-seçkilik ilə yoğrulur, dünyaya gəlir, “ayaq açır”, yəni belə siyahıların mayasında haram var!

Nəticə nədi? Nəticə odu ki, əslində nəcib görünən təşəbbüs narazılıq, qanqaraçılıq, kinayə və atmacalar ilə müşayiət olundu. “Qarabağ”la idman jurnalistlərinin arasından yenə “qara pişik keçdi”.

Öz aramızdı, son vaxtlar belə pişiklərin sayı hədsiz artıb, daha torbaya salmaq da çətindi!

MÜZƏFFƏR QULUZADƏ