Türkiyənin “Trabzonspor” klubunun azarkeşləri maraqlı addım atıb.

“Qara dəniz” təmsilçisinin fanatları Şuşaya səfər edib. Azarkeşlər komandanın dəyişməz şüarı olan "Bizə hər yer Trabzon"u səsləndiriblər.

Bu məsələyə görə türkiyəli qardaşlarımıza təşəkkür edirik. Onların Azərbaycana olan sevgililərini bilməyən yoxdu. Bundan əlavə, türkiyəli azarkeşlərin çılğınlığı, komandalarına məhəbbəti dünya ölkələrinə nümunədi. Halal olsun ki, min kilometrdən çox məsafəni qət edib, Şuşaya gəliblər.

Bundan Azərbaycanda fəaliyyət göstərən idman jurnalistləri qurumları – Azərbaycan İdman Jurnalistləri Federasiyası və Azərbaycan İdman Jurnalistləri Assosiasiyası dərs çıxarsın. Qarabağ azad olunandan sonra şəxsən “Futbol+”in əməkdaşları 5 ölkədə səfərdə olub. Özü də digər media mənsubları ilə birgə. Sağ olsun, “Neftçi” və “Qarabağ”, bu məsələni həll ediblər. Amma adları çəkilən qurumlar bir dəfə də olsun, Şuşaya, Füzuliyə idman jurnalistlərinin səfərlərini təşkil edə bilməyib. Məsələ pul problemidisə, əminəm ki, mediada fəaliyyət göstərən hər kəs 40-50 manatından keçməyə hazırdı. Elə təkbaşına özümüz də gedə bilərik. Amma ölkə daxilində, öz dilbər guşələrimizə bu qurumlar səfər təşkil edə bilməyəcəklərsə, nəyə və kimə lazımdılar?



İLKİN SULTANLI