“Öncə onu deyim ki, Kurban cəmi bir ildi gəlib. Qapıçıları saymasaq, demək olar ki, əlində heyət yox idi. Bu bir il ərzində çox böyük işlər gördü. Komandanın özünəinamı qayıtdı. Əksər futbol mütəxəssisləri, media, azarkeşlər onun işini çox bəyəndi. Kurban klubda dönüş yarada bildi. Mövsümün gedişində, ən vacib məqamda dörd-beş oyunçu sıradan çıxdı. Birinci dövrədə 18 xal yığan komanda digər üç dövrələri götürsək, autsayderlərdən oldu. Buna baxmayaraq, Berdıyev hər vəziyyətdə komandanı qoruyub saxlaya bildi. Üçüncü yerdən cəmi üç xal geridə qaldıq. Klub rəhbərliyi də ona inandı. Azarkeşlərimiz Berdıyevə böyük rəğbət bəsləyir. Uğurlu “Turan Tovuz” görəcəyimizə inanırıq. Kurban sözünü deməmiş gedən deyil. Onun xarakteri belədi, belə formalaşıb. Saysız-hesabsız titulları var. Çox inamlı insandı. Bizə söz verib ki, “Turan Tovuz”a titul qazandıracaq. Gələn mövsüm də mübarizə aparmaq çox çətin olacaq. Büdcə çox böyük rol oynayır. Əlbəttə, beş-altı milyon büdcəsi olan komanda 30 milyonluq rəqiblərlə mübarizə apara bilməz. Komandanın uğuru titul qazanmaq deyil, yaxşı oyun göstərməkdi. Daha çox vəsait olsa, böyük maliyyə ayrılaraq güclü futbolçular gəlsə, başqa məsələ”.