Hətta illik 45 milyon avro maaş təklifi ilə də Viktor Osimheni Səudiyyə Ərəbistanına gəlməyə razı sala bilməyən ''Əl-Hilal'' indi də diqqətini Türkiyədə çıxış edən digər tanınmış forvarda yönəldib.

"Football-plus.az" xəbər verir ki, söhbət ''Fənərbaxça''lı Yussef Ən-Nəsiridən gedir.

''Africafoot'' saytının paylaşdığı məlumata görə Səudiyyə Ərəbistanı nəhəngi merakeşli forvarda görə ''Fənər''ə 30 milyon avro təklif edib. Daha öncə Türkiyə mətbuatında qeyd olunurdu ki, Joze Mourinyo birmənalı şəkildə rəhbərlikdən Ən-Nəsirinin komandada saxlanılmasını tələb edib. Ünlü məşqçinin bu futbolçu ilə bağlı ciddi planları var. Bəlkə də bu üzdən ''sarı-lacivərdlilər'' 30 milyon avroluq təklifi geri çeviriblər. Daha doğrusu, İstanbul nəhəngi qarşı tərəfdən 40 milyon avro tələb edib. Bu məbləği Türkiyə futbolu üçün astronomik adlandırmaq olar.

Qeyd edək ki, ötən yay 19,5 milyon avroya heyətə cəlb olunan və klub tarixinin ən bahalı transferi statusunda olan Ən-Nəsiri geridə qoyduğumuz mövsümdə bütün turnirləri nəzərə almaqla 30 qol vursa da, fanatlarla ulduzu barışmadı. ''Fənər''in son ev oyunlarında ən çox fitə basılan futbolçu məhz Ən-Nəsiri idi. Bu üzdən bu yay onun ayrılması sürpriz olmayacaq.