Joze Mourinyonun etimadını qazana bilməyən və qışda Amerikaya yollanaraq icarə əsasında ''Los Anceles''ə transfer olunan Cengiz Ündərlə bağlı yeni xəbər var.

"Football-plus.az"ın məlumatına görə, MLS təmsilçisi bu futbolçu ilə bağlı yekun qərarını açıqlayıb.

Fevralın əvvəllərində Cengizi 1,2 milyon avroya 6 aylığa icarəyə götürən ''Los Anceles'' onu 25 milyon dollara daimi əsasda transfer etmək hüququna da malik idi. Amma klub bu hüquqdan yararlanmaq istəməyib və Cengiz ilə yolların ayrılacağını açıqlayıb. İcarə müddəti iyunun 30-da tamam olacaq. Yəni 27 yaşlı vinger həmin tarixdən sonra ''Fənərbaxça''ya qayıtmalı olacaq.

Cengizin adı Klublararası Dünya Çempionatı üçün FİFA-ya göndərilən iştirak ərizəsinə də salınmayıb.

Ündər indiyə qədər ''Los Anceles''in heyətində meydana çıxdığı 15 rəsmi oyunda aktivinə 2 qol, 3 məhsuldar ötürmə yazıb. ''Fənərbaxça'' ilə hələ ikiillik müqaviləsi olan Ündər çox güman, bu yay başqa kluba icarəyə veriləcək.