Yüksək maaşı qarşılığında ''Fənərbaxça''ya bu mövsüm heç bir faydası dəyməyən Cengiz Ündərin qış transfer dönəmində klubu ilk tərk edən futbolçulardan olacağı gözlənilirdi. Amma Joze Mourinyonun gözünə heç cür girə bilməyən Cengizin nə ''Beşiktaş''a, nə Rusiyaya, nə də İtaliyaya keçidi baş tutdu. ''Beşiktaş'' fanatların etirazı üzündən son anda ondan vaz keçdi.

Avropada transfer dönəmi artıq bağlandığından Cengizin ya okeanın o tayına, ya da Səudiyyə Ərəbistanı, Qətər kimi ölkələrə keçidi baş tuta bilər. Bu arada Türkiyə mətbuatının yazdığına görə 27 yaşlı vinger karyerasını ABŞ-da davam etdirəcək. Belə ki, ''Los Anceles'' həm ''Fənərbaxça'', həm də Cengizin özü ilə anlaşma əldə edib. MLS klubu 1,2 milyon avro qarşılığında Ündəri 6 aylığa icarəyə götürmək niyyətindədi. Futbolçunun bu 6 ay ərzində olan maaşı iki klub tərəfindən yarıbayarı ödəniləcək.

Müqavilədə daimi transferlə bağlı maddə də var. Viza ilə bağlı məsələləri yoluna qoyduqdan sonra Cengiz ən qısa müddətdə tibbi müayinədən keçmək üçün ABŞ-a yollanacaq. Uqo Lyoris və Olivye Jiru kimi tanınmış simalar da ''Los Anceles''də top qovur. Cengizin bu mövsüm ''Fənərbaxça''da 9 rəsmi oyunda cəmi 252 dəqiqə oynamaq şansı qazandığını, aktivinə qol və ya məhsuldar ötürmə yaza bilmədiyini də xatırladaq.

ƏLİ