Premyer-liqada mövsümü çox zəif keçirməsinə baxmayaraq Avropa Liqasının qalibi olan və Çempionlar Liqasında oynamağa haqq qazanan ''Tottenhem''in aparıcı üzvlərindən olan Ceyms Meddison son 2 gündə ''Qalatasaray''la bağlı paylaşımlar etməsi ilə diqqət mərkəzinə düşüb.

"Football-plus.az" xəbər verir ki, hazırda tətildə olan 28 yaşlı futbolçunun ''instaqram'' səhifəsində 2 milyondan çox təqibçisi var.

Təcrübəli yarımmüdafiəçi iyunun 10-da ''instaqram''ın hekayə bölümündə ''Qalatasaray'' forması ilə bir video paylaşdı. Onun bu videosu ''Cim-Bom'' fanatları tərəfindən böyük marağa səbəb oldu.

Görünür, ''Qalatasaray''la bağlı paylaşımın çoxlu baxış yığmasından ilhamlanan Meddison iyunun 11-də daha bir paylaşım etdi. O, Dris Mertensin ''Qalatasaray''da geydiyi ''10'' nömrəli forma ilə şəkil paylaşaraq təcrübəli belçikalının profilini ora qeyd etdi və ''hər zamankı kimi zövqlə. Dris Mertens nə oyunçu idi ama'' sözlərini yazdı.

Bu paylaşımların ardından Meddisonun səhifəsi son iki gündə sanki sarı-qırmızı rənglərə boyanıb. Onun son şəkillərini minlərlə ''come to Galatasaray'' şərhi bəzəyir. Amma indiyə qədər mətbuatda İstanbul nəhənginin bu futbolçuya maraq göstərməsi barədə hər hansı bir xəbər paylaşılmayıb.

Meddisonun geridə qoyduğumuz 42 rəsmi oyuna çıxaraq aktivinə 12 qol, 11 məhsuldar ötürmə yazdığını bildirək.