''Qalatasaray''la ''Fənərbaxça'' arasında çempionluq rəqabəti və intriqa davam edir.

''Football-plus.az'' xəbər verir ki, az qala hər tur İstanbul nəhəngləri matçlardan sonra söz davasına çıxaraq bir-birilərini sancmağa çalışırlar. Düzdü, onların hər birinin əzəli rəqibin oyunundakı hakim səhvləri barədə iradları çox vaxt əsassız olur.

Məsələn, son turda ''Fənərbaxça''nın ''Çaykur Rizəspor''la qarşılaşmadakı geridönüşünün ardından ''Qalatasaray'' hakim ədalətsizliyi barədə aləmə car çəkdi. Halbuki həmin oyunda rizəlilərin iki futbolçusunun meydandan qovulmasına və ''Fənər''in 0:2-ni 3:2-yə çevirməsinə baxmayaraq hakimin nəticəyə təsir edən səhvi olmadı. Bu dəfə isə irad bildirmək növbəsi ''Fənərbaxça''ya, daha dəqiq desək, Joze Mourinyoya çatıb.

Dünən 22-ci turun son oyununda ''Qalatasaray'' səfərdə ''Qaziantep'' üzərində minimal hesablı çətin qələbə qazandı. İlk yarının ortalarında yaşanan bir epizodda Muslera cinah ötürməsinin qarşısını kəsmək istəyərkən topu əlində saxlaya bilmədi. Nəticədə top onun önündəki Devinson Sançesin əlinə dəydi. Meydan sahiblərinin etirazına baxmayaraq hakim penalti təyin etmədi. Elə oyundan sonra sabiq hakimlərdən ibarət ekspertlər də penalti olmadığını və hakimin oyunu davam etdirməklə düzgün qərar verdiyini vurğuladılar. Amma Mourinyo görünür, bununla razılaşmır. Tanınmış portuqaliyalı mütəxəssis bu epizodla bağlı ironiyalı bir paylaşım edib. O, topun ələ dəydiyi epizodun şəklini paylaşaraq bunları yazıb:

''Qalatasaray'' cəbhəsində bu paylaşıma cavab vermək öhdəliyini boş-bekar Mauro İkardi üzərinə götürdü. Zədə üzündən mövsümü çoxdan başa vuran argentinalı hücumçu ''instaqram'' səhifəsinin hekayə bölümündən diqqətçəkən paylaşımlar etdi. O, Mourinyoya həsr olunan ''crying one'' (ağlayan biri) paylaşımını etdi, eləcə də ''Fənər''ə həsr olunan qol sevinclərinin şəklini paylaşdı. Bundan başqa bir matçda topun Tadiçin əlinə dəydiyi epizodu paylaşaraq ''həndbol üzrə dünya çempionatı'' yazdı. Sonda da bu mövsümkü derbidə ''Fənər''li Cikunun ona qarşı kobudluğunun videosunu paylaşdı.

Qeyd edək ki, Mourinyo daha öncə də bir neçə dəfə ''Qalatasaray''ın oyunlarından sonra buna bənzər paylaşımlar etmişdi.

ƏLİ