DÇ-2026-nın seçmə mərhələsində oyunlar davam edir. Dünən Cənubi Amerika və Asiya zonasından mundiala vəsiqə qazanan yeni komandaların adları bəlli oldu.

"Football-plus.az" xəbər verir ki, Braziliya evdə Paraqvayı Vinisiusun qolu ilə minimal hesabla yenərək Karlo Ançelottinin başçılığı altında ilk qələbəsini qazandı. Ekvador isə səfərdə Peru ilə qolsuz bərabərə qaldı. Bu nəticələrlə həm Braziliya, həm də Ekvador seçmə mərhələni ilk ''6-lıq''da bitirməyi rəsmiləşdirərək DÇ-yə vəsiqəni təmin etdi.

Asiya zonasında isə Səudiyyə Ərəbistanı - Avstraliya oyununda bütün suallara aydınlıq gəldi. Son tur ərəfəsində bu komandalar arasında 3 xallıq fərq var idi və kağız üzərində Səudiyyə Ərəbistanının hələ də DÇ-yə vəsiqə qazanmaq şansı var idi. Amma reallıqda bu, praktiki olaraq mümkünsüz idi. Çünki ərəblər ən azı 5 top fərqi ilə qalib gəlməli idilər. Komanda hesabı açsa da, sonradan heç minimum hədəfin də öhdəsindən gələ bilmədi. Avstraliya 2:1 hesablı qələbə qazanaraq DÇ-2026-nın növbəti iştirakçısı oldu.

Artıq turnirdə iştirak edəcək 48 komandadan 35-i bəllidi. ABŞ, Meksika və Kanada ev sahibi qismində mundialda iştirak edəcəksə, İran, Yaponiya, İordaniya, Cənubi Koreya, Özbəkistan, Avstraliya, Yeni Zelandiya, Argentina, Braziliya, Ekvador seçmə mərhələdə uğurlu çıxış edərək bu hüquqa sahib çıxıblar.