Xatırlayırsızsa, "Şamaxı"nın baş məşqçisi Ayxan Abbasovun "Neftçi"nin futbolçusu Ağadadaş Salyanskini transfer etmək niyyətində olduğunu xəbər vermişdik.

Səbəb sadədi: U-21-in də çalışdırıcısı olan mütəxəssis parlaq gələcək vəd edən gəncləri sərəncamında görmək istəyir. Əlbəttə, bu məqam birbaşa yığmanın uğurlarına hesablanır. Ancaq Ayxan bəy məhz Ağadadaşla bağlı niyyətini yenidən götür-qoy etməyə qərar verib.

"Football-plus.az"ın əldə etdiyi məlumata görə, buna oyunçunun "Neftçi"də sərgilədiyi davranış səbəb olub. Belə ki, hücumçu əvəzedicilər liqasının 36-cı turunda "Sabah-2" ilə matçda təcavüzkar davranışa yol verib - 54-cü dəqiqədə rəqib futbolçunun boğazından tutaraq mübahisə etdikdən sonra qırmızı vərəqə alıb. Bu üzdən AFFA İntizam Komitəsi tərəfindən 4 oyun cəzalanan hücumçu klubunu 300 manat ziyana salıb.

Maraq üçün xatırladaq ki, Ağadadaş 2023/24 mövsümündə də xoşagəlməz davranışla yadda qalmışdı. O, əvəzedicilər liqasının 29-cu turunda "Sumqayıt-2"yə qarşı matçın 90+5-ci dəqiqəsində rəqibin o vaxtkı baş məşqçisi Vaqif Cavadovla mübahisə etdikdən sonra əxlaqsız jest nümayiş etdirdiyinə görə qırmızı vərəqə almışdı. O, bu səbəbdən 4 oyun cəzalanmış, "ağ-qaralar" 300 manat ödəməli olmuşdu.

Bəli, Ayxan Abbasov Ağadadaşı yığmanın hazırda davam edən təlim-məşq toplanışına dəvət edib. Ancaq bildirdiyimiz kimi, futbolçunun "Şamaxı"ya keçib-keçməyəcəyi sual altındadı.

KƏNAN BAHADIR