Bugünlərdə heyətini yenidən formalaşdırmağa başlayan "Neftçi"nin Mahir Emrelini transfer etmək niyyətində olduğu haqda xəbərlər yayıldı.

Düzü, bu seçimə görə paytaxt təmsilçisini qınamaq olmur. Ona görə ki, Mahir müsir futbolumuzun ən parlaq simalarından biridi və Misli premyer-liqasında istənilən klub üçün arzulanan oyunçudu. Yəni hansısa baş məşqçi onun komanda üçün faydalı olmayacağını düşündüyü bildirsə, yumşaq desək, qeyri-səmimi olar. Bu üzdən Samir Abasovun Mahirlə çalışmaq istəyi təbiidi və yüksək hədəflər uğrunda mübarizə aparacağı gözlənilən "ağ-qaralar" bu keçid sayəsində yalnız azarkeşlərinin nigaran qəlbinə su səpmiş olar.

Qısası, Emrelinin keçidi bakılılar üçün müsbət gözləntidən başqa nəsə vəd etmir. Hər halda, 28 yaşlı hücumçunun karyerası dillər əzbəridi. Amma...

"Neftçi" son illərdə xeyli təcrübəli futbolçunun performansından yararlana bilməyib. Siyahıda N qədər legioner varsa, yerli oyunçuların sayı da az deyil. Buna Emin Mahmudov, Qara Qarayev, Ramil Şeydayev və Filip Ozobiç kimi oyunçuları nümunə göstərmək olar.

Etiraf edək ki, adı çəkilən futbolçular kiçik istisnaları saymasaq, uzun müddətdi ki, varlığını unutdurub. İndi Mahir həmin siyahıya qoşulmaq ehtimalını gözardı edə bilməz. Və ümid edirik ki, etməyəcək. Çünki ona Almaniyanın 1-ci və 2-ci bundesliqa klublarından dəvət var.

Əlbəttə, Emrelinin "Neftçi"yə gələcəyinə inanmırıq, inanmaq istəmirik. Ancaq pul şirin şeydi. Bu üzdən hər ehtimala qarşı xəbərdarlıq edək: Mahir, "Neftçi"yə gəlmə, ha!

KƏNAN BAHADIR