Ölkə kubokunun finalı illərin təcrübəsi “Qarabağ”la son illərin ambisiyalı layihəsi “Sabah” arasında keçirildi.

Gərgin oyunun 90 dəqiqəsi 2:2 hesabı ilə başa çatdı. Matçda üç penalti təyin olundu, dramatik anlarla zəngin uzatma dəqiqələrində isə “bayquşlar” qələbə topunu vurdu. Amma indi nəticədən daha çox referi İnqilab Məmmədovun qərarları və VAR təyinatları müzakirə olunur.

Oyundan əvvəl sosial şəbəkələrdə dolaşan ehtimallar və narahat fikirlər təsdiqini tapdı. İnqilab Məmmədovun oyuna təyin olunması sürpriz deyildi. Çünki biz də qarışıq çoxları bu təyinatı əvvəlcədən proqnozlaşdırmışdı. Təcrübəli Əliyar Ağayevlə Elçin Məsiyev pley-off matçlarını idarə etmişdisə, başqa qərar gözləməyə dəyməzdi. Yaxşı, bəs adı çəkilən hakimlər VAR otağında da əyləşə bilməzdi?

Final kimi önəmli oyunda hakimə texnoloji dəstək verəcək VAR heyəti bir o qədər də inam yaratmadı. VAR-da Nicat İsmayıllı və köməkçisi Fərid Hacıyev yer aldı. Halbuki Fərid Hacıyev premyer-liqada tez-tez oyun idarə edir, amma burda yalnız köməkçi idi. Əvəzində cari mövsümdə elitada cəmi üç oyun idarə etmiş Nicat İsmayıllı VAR hakimi kimi bu ağır yükün altına girdi.

İsmayıllı bu mövsüm baş hakim kimi ilk təyinatı Misli premyer-liqasının 5-ci turunun “Kəpəz” - “Sabah” matçına alıb. Qarşılaşma qonaqların 3:2 hesablı qələbəsi ilə yekunlaşıb. Nicat bəy premyer-liqanın 4-cü turunun “Səbail” - “Qarabağ”, 35-ci turun “Neftçi” - “Səbail” matçında da iş başında olub. Bu görüşlərdə “Səbail” 3 top fərqli darmadağın yaşayıb. Əvvəlki matçlarla son final arasında qəribə bir ortaq xətt var. Nicatın bəyin idarə etdiyi bütün oyunlarda qalib komanda 3 qol vurub. 

Finaldan sonra sosial şəbəkələrdə hakimlik ciddi tənqid olundu. Oyunun tempinə, qərarların ardıcıllığına və penalti epizodlarına dair yüzlərlə paylaşım edildi. Bu o deməkdi ki, hakimlik yenə gündəmdə, yenə tənqidlərin mərkəzindədi. Azərbaycan futbolu üçün bir kubok finalı tarixə yazıldı. Amma suallar cavabsız, şübhələr açıq qaldı.

Görəsən, Frank de Blekere danışacaqmı?!

ƏSƏD SEYİDOV