“Düzünü desəm, belə olacağını gözləmirdik. Düşünürdük ki, qrupda birinci ola bilməsək də, ən azı ikinci kimi pley-offda oynamaq şansımız olar. Təəssüf ki, son oyunumuzu yaxşı keçirmədik. Son iki ildə keçirdiyimiz oyunlar arasında ən zəif performansımız Latviya ilə ev oyununda oldu. Məşqlərimiz çox yaxşı keçmişdi. 10 gündü bir yerdəyik. Hətta oğlanlardan ibarət komanda ilə yoxlama oyunumuz da olmuşdu. Oyunda erkən qol buraxdıq. Həmin qoldan sonra toparlanmamış ikinci səhvə yol verdik, bu isə komandada stress və ruh düşkünlüyü yaratdı. Buna baxmayaraq, irəli atıldıq, hücumlar etdik. Çünki biz mütləq qələbə qazanmalıydıq. Lakin müdafiədə buraxdığımız kobud səhvlər rəqibin hər hücumda bizi cəzalandırmasına səbəb oldu. Komanda olaraq, çox üzgünüz. Bu uğursuzluqdan nəticə çıxarmalıyıq. Səhvlərimizi, bu nəticəyə səbəb olan amilləri təhlil etməliyik. Futbolçularla ayrıca söhbətimiz olacaq. Artıq irəli baxmalıyıq. Komandanın son iki ildə gördüyü yaxşı işlərin sonunda belə nəticə əldə etməsi yaraşmadı. Çalışacağıq ki, bizi sevən azarkeşlərə və federasiyaya bu uğursuzluğu unutduraq”.