Xəbər verdiyimiz kimi, Azərbaycanın qadın futbolçulardan ibarət yığması iyulun 12-də Avropa çempionatının seçmə mərhələsi çərçivəsində növbəti oyuna çıxdı. Siyasət Əsgərovun çalışdırdığı komanda B liqasının 1-ci qrupunun oyununda evdə Macarıstan önündə darmadağın oldu – 0:5.

Yığma bu nəticədən sonra 4 xalla turnir cədvəlinin 4-cü pilləsində qərarlaşıb. Macarıstan isə 7 xalla ikinci yerə yüksəlib. Əsgərovun komandası bu gün Lozannada yerləşən “Olimpik De La Pontez” stadionunda İsveçrə ilə son oyuna çıxacaq. "Football-plus.az" olaraq baş məşqçi ilə əlaqə saxlayıb, bəzi suallarımıza cavab almağa çalışdıq.

- Macarıstana acı məğlubiyyətdən sonra komandada ab-hava necədi?
- Düzünü desəm, ab-hava heç də yaxşı deyil. Çünki gözləntimiz fərqli idi. İstəyirdik ki, evdə şansımızı maksimum dəyərləndirək. Təəssüf ki, məğlub olduq. Həm də gözlənilməz hesabla. Dönüb arxaya baxsaq, son illərdə, son aylarda belə uduzmamışdıq. Doğrudan da, bu məğlubiyyət komandamızı çox üzdü. Amma daha bir önəmli oyunumuz var. Bəzi şeyləri unutmağa məcburuq ki, ikinci oyuna yaxşı çıxaq. Ona görə də komandadaxili iclas etdik, danışdıq və bəzi şeylərin unudulmasını, növbəti matçda maksimum çalışmalarını istədik. İsveçrəyə gəldiyimiz gündən bəri məşqlərdən də görünür ki, komanda günbəgün daha da yaxşılaşır. Əhval-ruhiyyə baxımından da da düzəliblər. Ümid edirəm ki, qızlar bu oyunda özlərini yaxşı tərəfdən göstərəcəklər.

- Bəs Macarıstan önündəki darmadağının səbəbi nədi? Siz baş məşqçi kimi bunu nə ilə bağlayırsız?
- Məğlubiyyətin belə böyük hesabla olmasının səbəbləri var. Amillərdən birincisi o idi ki, oyunçularımızın əksəriyyəti Türkiyədə oynayır. Orda isə mayın 5-də çempionatın son oyunu olub. Düşünürdük ki, iyulun ilk həftəsi komandalar toplanar. Amma toplanmadılar, yığmanın oyunlarından sonraya qaldı. Ona görə də futbolçuların fiziki durumu heç də yaxşı deyildi. Amillərdən biri də dörd oyunçumuzun oynamamasıdı. İkisi zədə ilə bağlıdı, ikisi isə sarı vərəqə cəzalısıydı. Bu da komandamıza olduqca mənfi təsir etdi. Çünki məcburiyyətdən həmin boşluqları başqa mövqenin oyunçuları ilə doldurmaq istədik. Onlar da əllərindən gələni etsə belə, effekt vermədi. Digər tərəfdən, rəqib Macarıstan idi. Həm komanda, həm də fərdi baxımdan keyfiyyətli rəqib idi. Səhvlər etdik və qollar gələndən sonra istər-istəməz eniş yaşadıq. Nəticədə həmin hesab qaçılmaz oldu.

- İsveçrə ilə oyuna hazırlıq necə gedir?
- Komanda şəklində çox yaxşı hazırlaşırıq. Hər gün məşq edirik. Maksimum çalışır, hazırlaşırıq, hansısa problemimiz yoxdu. Əvvəlki oyunda iştirak etməyən iki cəzalımız qayıdır. Amma Aysun Sevdiyeva onsuz da millinin düşərgəsinə gələ bilməmişdi. Əsra Manyanın da zədəsi hələ ki sağalmayıb. Oyuna qədər ondan yaxşı xəbər gözləyirik. Macarıstan üzərindəki səhvlərimizi təhlil etdik, başa düşdük. Ümid edirəm ki, bundan sonra bir daha belə səhvlər etmərik.

- Macarıstanla oyunda Xanım Əsədova debüt etdi. 15 yaşlı Xanım barədə fikirləriniz?
- Xanım, doğrudan da, son illərdə üzə çıxan istedadlı qadın futbolçulardandı. Təəssüf ki, belə istedadlar barmaqla sayılacaq qədərdi. Amma biz çalışırıq ki, onları itirməyək. Nəzərimiz onların üzərindədi. Rusiya və Qazaxıstanda oynayan qızlarımız liqaları davam etdiyinə görə toplanışa iyulun 7-də qoşuldular. Amma biz iyulun 1-dən yığılmışdıq. Ona görə də Xanımı və başqa istedadlı qızları milliyə cəlb etmişdik, onlar da məşq prosesinə qatıldılar. Doğrudan da, Xanım özünü çox yaxşı tərəfdən göstərdi. Düşündük ki, onsuz da iki cəzalı futbolçumuz var, Xanımı ən azı “23-lüyə” salaq. Məşq prosesində necə istəkliydisə, ona şans verməyi qərara aldıq. Və bu onun üçün böyük stimul ola bilərdi. Xanımın məşq prosesinə yanaşması, üzərində işləməsi, çıxışı yanılmadığımızı göstərdi. Düşünürəm ki, yaxın gələcəkdə Xanım Azərbaycan qadın futbolunda ən böyük istedadlardan olacaq.

- Zədəlilərin durumu necədi?
- Aysun Sevdiyeva əməliyyat olunub. Onun toplanışa gəlməsi mümkünsüz idi. Bundan sonrakı kampda isə çalışırıq ki, Aysunu hazır edək. Zədəlilərdən təkcə Əsra Maniya qalıb ki, onun da əzələsində ağrı var. Həkimlər baxır. Oyuna qədər hazırlamağa çalışırıq, heç olmasa, hansısa zaman kəsiyində kömək edə bilsin. Amma başqa zədə problemimiz yoxdu.

- İndiki durumda yığmanın pley-off şansı necə görürsünüz?
- Hazırda 4 xalımız var, qrupda sonuncu yerdəyik. Bizim qrupun lideri isə İsveçrədi. O da ev sahibi olduğuna görə qrupların ən yaxşı 3 komandası pley-offa gedir. İsveçrə ev sahibi olduğuna görə onun yerinə ən yaxşı 4-cü yer də pley-offda oynayacaq. Yəni reqlamentdə belədi. Hazırda sonuncu yerdə olanlar arasında ən şanslısı bizim millidi. Buna görə sevinirik. Hələ bir oyunumuz var. Ona görə də İsveçrə ilə oyun bizim üçün çox önəmlidi. Ən azı 1 xal alsaq, pley-offu 100 faiz təmin edəcəyik.

RÖYANƏ OĞUZ