Türkiyə yığmasında iki debütant var - Montella hansı ulduzlara dəvət göndərmədi?
Avropanın klub futbolunda mövsüm, demək olar, başa çatıb.
Düzdü, qarşıdan klublararası dünya çempionatı gəlir. Amma ona qədər hələ yığma “pəncərəsi” də olacaq. Həmin “pəncərədə” həm Millətlər Liqasının final mərhələsi, həm DÇ-2026-nın seçmə mərhələsinin oyunları, həm də yoldaşlıq matçları keçiriləcək.
Qardaş Türkiyə yığmasını bu ay iki yoxlama oyunu gözləyir. Özü də okeanın o tayında! “Ay-ulduzlular” iyunun 2-dən etibarən Amerikaya yollanaraq Boston şəhərində hazırlıq keçəcək. Vinçentso Montellanın komandası iyunun 7-də Konnektikut şəhərində ABŞ, iyunun 10-da isə Şimali Karolinada Meksika yığması ilə üz-üzə gələcək. Türkiyə daha öncə amerikalılarla 4 dəfə qarşılaşıbsa, Meksika ilə ilk dəfə qarşılaşacaq.
Xatırladaq ki, hər iki ölkə DÇ-2026-nın ev sahiblərindəndi. Montellanın bu dəfə açıqladığı heyətdə diqqətçəkən məqamlar heç də az deyil. İlk növbədə “Beşiktaş”lı Mustafa Həkimoğlu ilə “Trabzonspor”lu Mustafa Eskihellaçın ilk dəfə yığmaya dəvət aldığını vurğulamalıyıq. Amma digər tərəfdən “Beşiktaş”ın təcrübəli qapıçısı Mərt Günokun siyahıda olmaması gözdən qaçmayıb. Montella bunu Mərtə istirahət vermək istəyi ilə əsaslandırıb. “Qalatasaray”dan isə Yunus Akgün və Əbdülkərim Bardakcı kimi ulduzlar yığmadan kənar qalıb. Yunus mayın 27-də əməliyyat olunub. Ona dəvət göndərilməməsini bununla əlaqələndirmək mümkündüsə, Əbdülkərimin nə üçün kənarda qaldığı bilinmir.
İtaliyalı məşqçinin 29 nəfərlik siyahısı ilə tanış olaq: qapıçılar – Uğurcan Çakır (Trabzonspor), Altay Bayındır (Mançester Yunayted), Berke Özər (Eyüpspor), Muhammed Şəngəzər (İstanbul BŞ); müdafiəçilər – Çağlar Söyüncü, Mərt Müldür, Yusuf Akçiçək (hamısı “Fənərbaxça”), Ərən Elmalı (Qalatasaray), Samet Akaydın (Çaykur Rizəspor), Merih Dəmiral (Əl-Əhli), Zəki Çəlik (Roma), Mustafa Eskihellaç (Trabzonspor), Yasin Özcan (Kasımpaşa); yarımmüdafiəçilər – Arda Gülər (Real), Hakan Çalhanoğlu (İnter), Dəmir Ege Tıknaz (Riu Ave), Orkun Kökçü, Kərəm Aktürkoğlu (Benfika), İsmayıl Yüksək, İrfan Can Kahveci, Oğuz Aydın (hamısı “Fənərbaxça”), Kaan Ayhan (Qalatasaray), Okay Yokuşlu (Trabzonspor), Salih Özcan (Borussiya D), Can Uzun (Ayntraxt F); hücumçular – Barış Alpər Yılmaz (Qalatasaray), Kənan Yıldız (Yuventus), Dəniz Gül (Portu), Mustafa Həkimoğlu (Beşiktaş).
Montella mətbuat konfransında bunları deyib:
“Son illərdə komandamızın nüfuzu bir qədər də artıb. DÇ-yə evsahibliyi edəcək yığmalara qarşı oynamağımız bunu bir daha göstərir. Biz bütün hazırlıq oyunlarını müəyyən məntiqə əsaslanaraq keçiririk. Belə oyunlarda hətta məğlubiyyət də bəzən komandaya faydalı olur. Dünyanın o biri başından oynamaq üçün dəvət aldıq və bu da bizi qürurlandırır. Artıq mövsümün sonuna çatmışıq. Bəzi oyunçulara istirahət vermək qərarına gəldim. Onların yeni mövsümdə fiziki və psixoloji cəhətdən yaxşı durumda olaraq bizə kömək etmələrini istəyirəm. Çünki əsas oyunlarımız sentyabrda başlayacaq. Ona görə də hələlik heyətə yeni, gənc isimlər dəvət etməyi daha məqsədəuyğun bildik. Mərt Günok ötənilki AÇ-dən sonra dincəlməmişdi. Aral Şimşir və Əmirhan Topçunun ağrıları var. Həkimlərlə məsləhətləşdik və riskə getmək istəmədik. Fərdi Kadıoğlunun durumu isə bizi də üzür. Zədəsi gözləniləndən uzun çəkdi. Ümid edirəm ki, tezliklə məşqlərə başlayacaq və sonrakı oyunlarda bizlə olacaq”.
Digər xəbərlər
