Bütün komandaların cəza ilə üzləşdiyi turda hakimlər futbolçulara 20 sarı, 2 qırmızı vərəqə göstərdi. Amma məşqçilərdən heç biri ictimaiyyət önündə narazılığını dilə gətirmədi.

Bütün narazılıqlar meydanda qaldı və beləcə mövsüm bitdi.

Səbail - Sumqayıt, RƏŞAD ƏHMƏDOV
Autsayderlərin dueli rəngarəng epizodlarla yadda qaldı. "Səbail" favorit statusunu doğruldan "Sumqayıt"ın böyükhesablı qələbəsi fonunda pis təsir bağışlamadı. Gərgin keçən 90 dəqiqə ərzində daha çox sadə epizodların şahidi olduq. Belədə Rəşad Əhmədovun yükü xeyli yüngülləşdi. O, futbolçuların kobud oyununa şərait yaratmamaqla yanaşı, xırda qayda pozuntularını da gözməzdən gəlmədi. Referi yalnız laysman Sevda Nuriyevanın yanlış qərarı zamanı tərəddüd yaşadı. Söhbət mingəçevirli ədalət təmsilçisinin Hüseynəli Quliyevin fərqlənməyə çalışan Cəsurbek Cəloliddinovu yerə sərməsi səbəbindən penalti qərarı verdiyi zaman Nuriyevanın bayrağı havaya qaldırmasından gedir. Hər halda, referi VAR-a yollanandan sonra xanım həmkarının səhvə yol verdiyini aşkarladı və öz qərarını dəyişmədi. Odu ki, Rəşad bəyin nə vərəqələrində, nə də "nöqtə"ni göstərməsində qəbahət var.

Sabah - Neftçi, TURAL QURBANOV
Bir sarı, iki birbaşa qırmızı vərəqə! Belə statistika kənardan xoşagəlməz hal kimi görünə bilər. Ancaq söhbət paytaxt derbisindən, "Sabah" və "Neftçi" kimi iki iddialı komandanın mövsümü 5-ci yerdə bitirmək uğrunda mübarizəsindən gedirsə, belə məqamlar ancaq prinsipiallıqdan və əzmkarlıqdan xəbər verir. Odu ki, nə futbolçuları qınamağa ehtiyac var, nə də onlara layiqli cəzanı verən Tural Qurbanovu. Çünki tərəflər mübariz oyun tərziylə, hakim matçın əhəmiyyətini dərk etməsiylə ön plana çıxdı. O, yetərincə ciddi qayda pozuntusu zamanı səbrli davrandı. İnsafən, Sofian Çakla ilə Edvin Kuçun kobud müdaxilə baxımından həqiqətən sərhədləri aşdığını deməliyik. Öz aramızdı, hakimlikdən narazı qalanda kəskin danışmaqdan çəkinməyən Vasili Berezutski və Samir Abasov da Tural bəy haqda pis nəsə demədi. Qısası, gənc hakim paytaxt derbisinin öhdəsindən gəldi. 

Şamaxı - Qarabağ, RAUF CABBAROV
Oyun ümumilikdə sakit keçdi. Meydanda gərginlik yox idi. Rauf Cabbarovun idarəçiliyi ciddi mübahisə doğurmadı. Əsasən qaydalar çərçivəsində gedən mübarizə izlədik. Baş məşqçilər oyunsonrası mətbuat konfransında hakim idarəçiliyi ilə bağlı narazılıq etmədi. Cabbarov altı futbolçuya sarı vərəqə göstərdi ki, hamısı haqlı idi. 

Turan Tovuz - Kəpəz, FƏRİD HACIYEV 
Qərb derbisi Fərid Hacıyevə həvalə olunmuşdu. Matçın ümumi axarı gərgin olsa da, hakim oyunu nəzarət altında saxlaya bildi. Hacıyev“Kəpəz”dən 3, “Turan Tovuz”dan 1 futbolçuya “sarı” göstərdi. Aleks Souza 3-cü topu rəqib qapısından keçirsə də, qol qeydə alınmadı. “Kəpəz”in futbolçusu top uğrunda mübarizə zamanı yerə yıxılmışdı. Hakim mübarizəni qayda pozuntusu kimi qiymətləndirdiyi üçün qolu qeydə almadı. 18-ci dəqiqədə Azər Bağırov emosiyalarını cilovlaya bilmədi, baş hakimə etiraz edən məşqçi meydandan çıxan topu ayağı ilə yenidən oyuna qaytardı. Onu sakitləşdirmək isə dördüncü hakimin üzərinə düşdü. Ümumilikdə hakimin idarəçiliyini qənaətbəxş saymaq olar.

Araz-Naxçıvan – Zirə, CAVİD CƏLİLOV
Cəlilovun idarəediciliyi ilə bağlı ciddi problem olmadı. Nə baş məşqçilər, nə də azarkeşlər hakimkdən narazı qaldı. Oyunun tempini qorumağa çalışan Cəlilov tez-tez oyunu saxlamamağa çalışsa da, hər şeyə göz yummadı. İlk hissədə “Zirə”nin, 2-ci hissədə “Araz”ın iki futbolçusuna sarı vərəqə göstərdi.