Bu il Avropa futbolunda çox maraqlı və ilklərlə zəngin olan bir mövsümü geridə qoyduq.

Təbii ki, ən önəmli ilk Çempionlar Liqasında yaşandı. 14 ildi, qətərlilərin himayəsində olan PSJ ''İnter''i finala yüksəlməyinə peşman etdi. Paris nəhəngi nəhayət, tarixində ilk dəfə ÇL-in qalibi olmaqla böyük bir həsrətə son qoydu.

Elə digər ölkələrdə də maraqlı ilklər yaşandı. Məsələn, İngiltərə liqa kubokunun finalında ''Liverpul'' üzərində qələbə qazanmaqla ''Nyukasl'' 70 illik fasilədən sonra ölkə daxilində ilk titulunu qazandı. Avropa Liqasını qazanan ''Tottenhem'' 17, İtaliya kubokunu qazanan ''Bolonya'' 51 ildən sonra ilk titulunu qazandı. İngiltərə kubokunun qalibi olan ''Kristal Pelas'' isə ümumiyyətlə tarixinin ilk titulunu qazandı! Eləcə də ''Bavariya'' ilə bundesliqanın qalibi olan İngiltərə yığmasının kapitanı Harri Keyn də böyük bir həsrətə son qoyaraq peşəkar karyerasının ilk tituluna sahib çıxdı.

Elə ölkəmizdə də ilk yaşandı. ''Sabah'' kubokun finalında dramatik oyunda ''Qarabağ''ı üstələyərək elə də böyük olmayan tarixinin ilk titulunu qazandı.