''Fənər''li futbolçular rəhbərliyə Mourinyo ilə bağlı şərt qoydular!
''Fənərbaxça''da çətin və çalxantılı günlər davam edir. Bir tərəfdən başqan Əli Koça qarşı imza kampaniyası aparılırsa, digər tərəfdən futbolçular da ''qazan qaldırır''.
Komanda daxilində ab-havanın qaydasında olmadığı məlum olub. Bunun aşkar sübutunu zatən 35-ci turda hər kəs görmüşdü. Həmin vaxt ''İstanbul BŞ'' ilə səfər oyununda komanda yoldaşları Duşan Tadiçin qarşısını kəsməsəydi, onunla Anderson Talişka elə meydanın ortasında əlbəyaxa olacaqdı.
Rəhbərliyin təzminat məsələsi üzündən əli-qolu bağlıdı. Joze Mourinyonun köməkçiləri qovulsa da, portuqaliyalı mütəxəssis belə görünür, işini davam etdirəcək. Amma Mourinyonun vəzifəsində qalması bir çox futbolçunun narazılığına səbəb olub.
Türkiyə mətbuatının yazdığına inansaq, 5 futbolçu - Ləvənt Mercan, Cenk Tosun, İrfan Can Kahveci, İsmayıl Yüksək və Aleksander Ciku rəhbərliyin qarşısına ''Mourinyo ilə yola davam edilsə, biz gələn mövsüm üçün komandada yoxuq'' şərtini irəli sürüblər. Bundan başqa Anderson Talişka ilə Fred rəhbərliyə belə bir şərt qoymasalar da, onların Mourinyonun oynatdığı sistemdən kəskin narazı olduqları məlum olub.
Bu iddiaları gücləndirən ən tutarlı açıqlamanı bu günlərdə Elvir Baliç vermişdi. ''Fənərbaxça''nın sabiq futbolçusu olan və hazırda ''Bein Sports''da şərhçi kimi çalışan Baliç komanda daxilində ciddi problemlərin olduğuna işarə vuraraq bunları demişdi:
''Mənim gözümdə artıq Mourinyonun heç bir nüfuzu qalmayıb. Ona daha bir mövsüm səbr edilməməlidi. Komandada qarşılıqlı sevgi və hörmət varsa, futbolçular baş məşqçi üçün oynayır. ''Qalatasaray''lı futbolçuların 99 faizi Okan Buruku sevir. ''Fənərbaxça''lı futbolçuların isə əksinə 90 faizi Mourinyonun qovulmasını istəyir''.
Digər xəbərlər
