Çempionluq həsrətinə son qoymaq hədəfi və böyük ümidlərlə ''Fənərbaxça''nın başına keçən Joze Mourinyo həftələr ötdükcə daha çox müzakirə olunmağa başlayır. Çünki komanda heç də yaxşı oynamır. Elə nəticələr də ürəkaçan deyil.

Cəmi 9 tur arxada qalmasına baxmayaraq ''Fənərbaxça'' 1 oyun az keçirməklə artıq ''Qalatasaray''dan 8 xal geridədi. Portuqaliyalı mütəxəssis ''Samsunspor''la oyunun (2:2) ardından sistemlə bağlı iradları qəbul etməyərək ''problem taktikamızda deyil. Problem mənim istədiyim taktikanın meydanda düzgün yerinə yetirilməməsindədi'' açıqlaması ilə diqqət çəkmişdi.

Bu arada Mourinyonun konkret hansı futbolçulardan narazı olduğu bəlli olub. Türkiyə mətbuatının iddiasına görə ünlü çalışdırıcı idman direktoru Mario Branko ilə görüşdə İrfan Can Kahveci, Çağlar Söyüncü, İsmayıl Yüksək, Osayi-Samuel və Oğuz Aydından gileylənib. Məsələn, Mourinyo İrfan Canın çox statik və yumşaq futbolçu olduğunu düşünür. Onun daha sərt və aqressiv olmasını istəyir. Jozenin İsmayıl Yüksəkdən narazılığı onun taktikaya uyğun gəlməməsi, öz mövqeyini tez-tez itirməsi və boş buraxması ilə bağlıdı. Osayi-Samuel isə futbol ölçülərinə görə o qədər də ucaboy deyil. Onun boyu 175 sm-di.

Mourinyonun fikrincə, nigeriyalı hava toplarında sıxıntı yaşayır və üstəlik müdafiə olunmaq qabiliyyəti də zəifdi. Bütün bunlara görə Mourinyo müdafiənin sağında hələ ki, Mərt Müldürə üstünlük verir. Çağlar Söyüncü Mourinyonun fikrincə, rəqibə öndə təzyiq göstərə bilmir və daim arxaya qaçmağa çalışır. Oğuz Aydının isə komanda şəklində müdafiə olunmaq qabiliyyəti yoxdu. Çatışmayan cəhətləri çox olduğu və inkişaf etmədiyi üçün bu futbolçu demək olar, oynamır.

ƏLİ