“Yunayted”in kapitanına astronomik təklif
“Mançester Yunayted”in lideri və kapitanı Bruno Fernandeş tezliklə klubu tərk edə bilər.
İngiltərə mətbuatının yazdığına inansaq, “Əl-Hilal” təcrübəli portuqaliyalı yarımmüdafiəçiyə görə mankunianlara 100 milyon funt sterlinq təklif etmək niyyətindədi! Hətta “Skay Sports”un iddiasına görə, Fernadeşin meneceri Migel Pinyo bugünlərdə Ər-Riyadda “Əl-Hilal” rəsmiləri ilə danışıqlar apararkən görüntülənib.
Bu transfer baş tutacağı təqdirdə 30 yaşlı yarımmüdafiəçi dünyanın ən çox qazanan futbolçularından birinə çevriləcək.
Hazırda Fernandeş Mançesterdə həftəyə 250 min funt sterlinq qazanır. Şayiələrə görə, o, Səudiyyə Ərəbistanında oynamağa razılıq versə, bundan üç dəfə artıq qazanmaq imkanı əldə edəcək! Bu arada baş məşqçi Ruben Amorim də həmyerlisinin klubdan ayrılmaq ehtimalı barədə açıqlamalar verib:
“Fernandeşin ayrılacağını düşünmürəm. Məndə belə bir hiss var ki, o, klubumuzda qalmaq istəyir. Çünki indiyə qədər dəfələrlə sərfəli təklifləri geri çevirib. “Yunayted” pul qazanmaq istəyirsə, bunu etməyin başqa yolları da var. Düzdü, bu mövzuda sizə konkret cavab verə bilməyəcəm. Amma mən Fernandeşin “Yunayted”də qalacağını düşünürəm”.
Portuqaliya yığmasının da aparıcı futbolçularından olan Fernandeş geridə qoyduğumuz mövsümdə 57 rəsmi oyunda iştirak edərək 19 qol, 20 məhsuldar ötürməlik diqqətçəkən performans sərgiləyib.
Transfer dəyəri 50 milyon avro civarında olan bu futbolçunun mankunianlarla müqavilə müddəti 2027-ci ilə qədər nəzərdə tutulub.
Digər xəbərlər
