Braziliya yığmasının yeni baş məşqçisi Karlo Ançelotti 2026-cı ildə keçiriləcək dünya çempionatının seçmə turnirinin növbəti matçları üçün heyəti açıqlayıb.

Bu haqda Braziliya Futbol Konfederasiyasının mətbuat xidməti məlumat yayıb.

Heyətə 25 futbolçu daxil edilib. Ən böyük sürpriz Ançelottinin rəhbərliyi altında “Real”da çıxış etmiş Rodriqo Qoesin heyətə salınmaması olub. Bundan əlavə, “Santos”un zədəsini yenicə sağaldan hücumçusu Neymar da qarşıdakı oyunlarda iştirak etməyəcək. “Betis”in hücumçusu Antoni uzun fasilədən sonra - 2023-cü ilin martından bəri ilk dəfə milli komandaya çağrılıb.

Həmçinin “Mançester Yunayted”in yarımmüdafiəçisi Kazemiro da heyətə qayıdıb. Qeyd edək ki, Braziliya yığması DÇ-2026-nın seçmə mərhələsində iyunun 6-da Ekvador, iyunun 11-də isə Paraqvay ilə qarşılaşacaq.

Bu arada FİFA Ançelottinin Braziliya yığmasına təyinatı ilə bağlı məsələni araşdırmağa başlayıb. Ali futbol qurumu təyinat zamanı futbol agentləri ilə bağlı mövcud qaydaların pozula biləcəyindən şübhələnir.

“Globo” qəzetinin yazdığına görə, FİFA-da konkret Dieqo Fernandesin fəaliyyəti şübhə doğurub. Məlumatda biznesmenin italiyalı mütəxəssis, onun sabiq klubu “Real” və Braziliya Futbol Konfederasiyası (BFK) arasında aparılan danışıqlarda vasitəçilik etdiyi və bu fəaliyyətlə məşğul olması üçün lisenziyaya malik olmadığı bildirilib.

FİFA BFK-dan Fernandesin iştirakıyla aparılan danışıqlar prosesində imzalanan sənədləri və ödənişlərlə bağlı məlumatları istəyib. Səbəbkar isə danışıqlarda yalnız məsləhətçi kimi iştirak etdiyini deyib.