“Gələn mövsümdən klublar iki yerə bölünəcək”
“Şamaxı”nın baş məşqçisi Ayxan Abbasovun “Qarabağ”la oyundan sonra keçirilən mətbuat konfransında səsləndirdiyi fikirlər diqqəti cəlb etdi.
Təcrübəli mütəxəssis bildirib ki, komandası daha çox yerli futbolçulara üstünlük verəcək. Bu, ölkə futbolunun inkişafı baxımından önəmli addım sayılsa da, qarşıda duran suallar da az deyil.
Gələn mövsümdən etibarən legioner limiti ləğv olunursa, yerli futbolçulardan ibarət komandanın rəqabət aparmaq şansı nə dərəcədə realdı?
Bu sualı təcrübəli mütəxəssis Arif Əsədova ünvanladıq:
“Şamaxı”nın yerli futbolçulara üstünlük verməsi təqdirəlayiq addımdı. Bütün klublar bu istiqamətdə addımlar atmalıdı. Növbəti mövsümdən etibarən bir çox komandalarımıza yerli futbolçulara şans vermək üçün daha əlverişli şərait yaradılacaq. Artıq maliyyə imkanları yaxşı olan və avrokuboklarda ölkəmizi təmsil edən klublar keyfiyyətli legionerlərlə güclənə bilər. Yerli futbolçuya üstünlük verən komandaların isə maliyyə vəsaiti birbaşa öz klubuna köçürüləcək. Gələn mövsümdən klublar iki yerə bölünəcək. Çempionluq uğrunda mübarizə aparan 4-5 komanda və əsas diqqəti yerli futbolçuların inkişafına yönəldənlər. Bu da ümumilikdə ölkə futboluna müsbət təsir göstərəcək”.
ƏSƏD SEYİDOV
Digər xəbərlər
