İsveçlə Danimarkanın birgə təşkil etdiyi dünya çempionatı başa çatdı.

"Football-plus.az" xəbər verir ki, 1/4 finalda Kanada üzərində sensasiyalı qələbə qazanan Danimarka yarımfinalda İsveçrə önündə darmadağın oldu – 0:7. “Saatsazlar” ardıcıl 2-ci il finala vəsiqə qazandı. Onlar ötənilki finalda çexlərə uduzmuşdular.

ABŞ yığması isə meydan sahibi İsveçi darmadağın etməklə 1933-cü ildən bəri ilk dəfə dünya çempionu olmaq imkanı qazandı. Düzdü, amerikalıların Olimpiada-1960-dakı qələbəsi dünya çempionluğu sayılır, ancaq həmin turnir ayrıca dünya çempionatı deyildi, qrup formatında, pley-offsuz keçirilmişdi.

Əvvəlcə 3-cü yer uğrunda oyun keçirildi. Qəhrəmanlıq limiti Kanada ilə oyunda bitən Danimarka İsveç önündə darmadağın oldu. Final oyununa gəlincə, 21-ci əsrdə ilk dəfə əsas vaxtda qol vurulmadı. Overtaymda fərqlənən ABŞ hokkeyçiləri 88-ci dünya çempionatının qalibi oldu.

Olimpiada-1960-ı saymasaq, 92 ildən sonra. İsveçrə finalların aşkar uğursuzudu. “Saatsazlar” tarixində 5-ci dəfə həlledici oyunda uduzdu və yenə dünya çempionu tituluna həsrət qaldı. Məhz bu komandanın qapıçısı Leonardo Cenoni mundialın ən dəyərli oyunçusu sayıldı. 37 yaşlı isveçrəli turnirdə keçirdiyi 7 oyunda 7 qol buraxıb, bir məhsuldar ötürmə verib, pley-offda əsas vaxtda qapısını toxunulmaz saxlayıb.

Çexiya yığmasının forvardı David Pastrnyak DÇ-nin bombardiri oldu. 29 yaşlı hokkeyçi 8 oyunda 15 (6+9) xal topladı. 10 oyunda 8 qol vuran isveçli forvard Elias Lindholm turnirin ən yaxşı snayperidi.

Bu arada DÇ-nin rəmzi yığması da açıqlanıb: qapıçı – Leonardo Cenoni (İsveçrə), müdafiəçilər – Zak Verenski (ABŞ), Din Kukan (İsveçrə), hücumçular – David Pastrnyak (Çexiya), Elias Lindholm (İsveç), Nik Olesen (Danimarka).

yarımfinal
İsveç – ABŞ 2:6 (0:2, 0:2, 2:2)
İsveçrə - Danimarka 7:0 (3:0, 1:0, 3:0)
3-cü yer uğrunda oyun
İsveç - Danimarka 6:2 (0:0, 3:0, 3:2)

final
İsveçrə - ABŞ 0:1 ОТ (0:0, 0:0, 0:0, 0:1)