Dünya çempionatında qrup mərhələsi başa çatdı. A qrupundan Kanada, İsveç, Finlandiya və Avstriya, B qrupundan isə İsveçrə, ABŞ, Çexiya və Danimarka 1/4 finala vəsiqə qazandı. Fransa və Qazaxıstan yığmaları elit divizionda yerini itirdi.

1/4 final mərhələsinin oyunları da keçirildi. ABŞ, İsveçrə və İsveç yığmalarının yarımfinala adlamasını təbii qarşılamaq olar. Amma Herninqdə keçirilən Kanada – Danimarka oyununun nəticəsi hokkeysevərləri şoka saldı.

Məhz bu oyunda DÇ tarixinin ən böyük sensasiyalarından biri qeydə alındı. Danimarka heyətində Sidni Krosbi ilə Natan Makkinnonun da olduğu Kanada üzərində əzmkar qələbə qazandı. Açığı, bu faktı dərk etmək, hansısa məntiqli izah tapmaq çox çətindi. Heç cür adamın ağlına girmir. Danimarka Kanadanı heç də ilk dəfə məğlub etmir, sadəcə, üç il əvvəl belə hadisə qrup oyununda baş vermişdi, həmin mərhələyə isə “ağcaqayın yarpaqları” bəzən o qədər də əhəmiyyət vermir. Üstəlik onda heyət də indiki kimi möhtəşəm deyildi. Kanada yığması turnirə yüksək səviyyəli MHL ulduzları ilə qatılıb, çoxları turnir başlamamış qızıl medalları onların boynundan asırdı. Karyerasının sonunda belə biabırçı nəticə ilə üzləşən veteran qapıçı Mark-Andre Flerinin nə çəkdiyini indi yalnız özü və Allahı bilir. Düzdü, o, ehtiyatda qalmışdı, amma bu heç də sakitləşdirici məqam deyil.

Oyunun əsas qəhrəmanı danimarkalıların qapıçısı Frederik Dixov oldu. O, kanadalıların 40 zərbəsindən 39-nu qaytardı. Oyunun sonluğu möcüzəvi alındı. Meydan sahibləri sona 2,5 dəqiqə qalmış 0:1 uduzurdular. Məhz bu məqamda Danimarkanın yeganə ulduzu – “Vinnipeq”in formasını geyən Nikolay Elers hesabı bərabərləşdirdi. Çexiyanın “Çeske-Budeyovitse” klubunda çıxış edən Nik Olesen tarixi şaybanı qapıdan keçirəndə isə tabloda 60-cı dəqiqənin 11-ci saniyəsi gedirdi. Favoritin qalan 49 saniyə ərzində məğlubiyyətdən qurtulmaq cəhdləri nəticə vermədi.

A qrupu
Latviya – Avstriya 1:6 (0:1, 1:2, 0:3)
Slovakiya – Finlandiya 1:2 (0:1, 0:1, 1:0)
İsveç – Kanada 3:5 (1:3, 1:1, 1:1)

1 2 3 4 5 6 7
1. Kanada 7 6 0 1 0 34-7 19
2. İsveç 7 6 0 0 1 28-8 18
3. Finlandiya 7 4 2 0 1 22-10 17
4. Avstriya 7 2 2 0 3 21-18 10
5. Latviya 7 3 0 0 4 17-25 9
6. Slovakiya 7 2 0 1 4 9-24 7
7. Sloveniya 7 1 0 1 5 9-29 4
8. Fransa 7 0 0 1 6 8-27 1

B qrupu
İsveçrə - Qazaxıstan 4:1 (0:1, 1:0, 3:0)
Çexiya – ABŞ 2:5 (0:1, 2:0, 0:4)
Almaniya – Danimarka 1:2 (0:0, 1:0, 0:1, 0:0, 0:1)

1. İsveçrə 7 6 0 1 0 34-9 19
2. ABŞ 7 5 1 0 1 34-14 17
3. Çexiya 7 5 1 0 1 35-14 17
4. Danimarka 7 3 1 0 3 25-24 11
5. Almaniya 7 3 0 1 3 20-22 10
6. Norveç 7 1 0 1 5 13-24 4
7. Macarıstan 7 1 0 0 6 8-39 3
8. Qazaxıstan 7 1 0 0 6 9-32 3

Qeyd: 1 – oyun, 2 – qələbə, 3 – overtaymda qələbə, 4 – overtaymda məğlubiyyət, 5 – məğlubiyyət, 6 – şayba fərqi, 7 – xal.

1/4 final
ABŞ – Finlandiya 5:2 (1:1, 2:1, 2:0)
İsveçrə - Avstriya 6:0 (3:0, 2:0, 1:0)
Kanada – Danimarka 1:2 (0:0, 0:0, 1:2)
İsveç – Çexiya 5:2 (3:0, 1:1, 1:1)