“Mançester Yunayted” Avropa Liqasının finalında “Tottenhem”ə uduzmaqla dünyanın dörd bir yanındakı, təbii ki, həm də Azərbaycandakı fanatlarını üzdü.

"Football-plus.az" xəbər verir ki, komanda yalnız bu turniri qazanmaqla azarkeşlərinin könlünün müəyyən mənada ala bilərdi ki, bunu da bacarmadı.

Final oyunu ərəfəsində “qırmızı şeytanlar”ın düşərgəsində elə maraqlı hadisələr baş verib ki...
Sonuncu avrokubok qənimətinin 2017-ci ildə qazanan (Avropa Liqasının finalında “Ayaks” məğlub edilmişdi) “Yunayted” camiəsi “Tottenhem”lə qarşılaşmanı səbirsizliklə gözləyirdi. Özü də “mahmızlar” bu mövsüm “qırmızı şeytanlar”ı dəfələrlə cəzalandırıb deyə, çoxları Bilbao finalına həm də qisas imkanı kimi baxırdı.

MY-də çalışanların niyyəti İspaniyaya yollanmaq idi. Amma klub rəhbərliyi bəzən hətta absurd səviyyəsinə çatan qənaət siyasəti çərçivəsində əməkdaşlarına mövsümün əsas oyunu üçün bilet vermədi. Əlbəttə, bir başqa top-klub bütün əməkdaşlarının İspaniyaya səfər xərclərini ödəyərdi. Hələ heç oyuna bileti demirik. Ancaq klub rəhbərliyi əvəzində əməkdaşlara klub kafesində istifadə olunan yemək talonları bağışladı. Yəni buyurun, kafedə televizor önünə keçin və oyuna baxın. Maraqlıdı ki, Ruben Amorimin komandası kuboku qazansaydı, yenə qənaət rejimi davam edəcəkdi. Heç bir halda şəhərdə çempionluq paradı təşkil olunmayacaqdı. Kubok Mançesterə gətirilsəydi, oyunçular və məşqçi korpusu klub bazasında kabab çəkəcəkdi.

Düzdü, hələ ser Aleks Ferqyusonun dövründə əsası qoyulan bir ənənəyə yeni rəhbərlik toxunmamışdı: futbolçular İspaniyaya Pol Smit brendinə məxsus 1000 funt sterlinqlik kostyumla yollanmışdı. Məşhur ingiltərəli dizayneylə əməkdaşlığın əsası 2008-ci ildə qoyulub.

MY-nin qəhrəmanlarından biri də Amorimdi. Əlbəttə, nəticələri nəzərdə tutsaq, birmənalı şəkildə mənfi qəhrəmandı. Amma... ESPN-in yaydığı xəbərə görə, portuqaliyalı məşqçi hər gün 14 saat çalışır. Səhər saat 7-də bazaya gəlir, bir də axşam saat 9-da evinə yollanır. Bilbao finalı üçün biletə layiq görülməyən “Yunayted” əməkdaşları isə fərqli bir səbəbdən Amorimə hörmət edirlər. İş ondadı ki, portuqaliyalı mütəxəssis məşqçi korpusu, xidmət personalı və onların ailə üzvlərindən ibarət 30 şəxsin İspaniyaya səfər xərclərini öz cibindən ödəyib. Klubun sahibi Cim Retkliffin inanılmaz xəsisliyi fonunda gözəl jest oldu! Müqayisə üçün bir faktı xatırladaq: PSJ bossları Çempionlar Liqasının finalını izləmək üçün Münhenə yollanan 600 əməkdaşının bütün gediş-gəliş xərclərini, biletinin pulunu ödəyib.

Mançesterdə qışdan bəri maliyyə məsələlərinə xüsusi diqqət yetirməyə başlayıblar. Məhz onda klub rəhbərliyi əməkdaşlarının sayının 20 faiz azaltmağa qərar verdi. İş yerini qoruya bilənlər isə sərt nəzarətlə üzləşib – hər funt sterlinqin hesabatını vermək lazım gəlir. Daha bir vacib qərar odu ki, əməkdaşlar isti nahar yeməklərindən də məhrum olunub. Qadağa yalnız meyvəyə aid deyil. Düzdü, sonradan rəhbərlik bu qərarı bir qədər yumşaldıb - əvvəllər olduğu kimi, yenə də əməkdaşlara sup və çörək pulsuz verilir. Qalan hər şey üçün pul ödəmək lazımdı. Bax, talon məsələsi də elə qışdakı həmin qərardan sonra işə düşüb.

Ümumiyyətlə, “Yunayted” və pul xüsusi toxunulası mövzudu. 16-cı pillədə qərarlaşan komanda hər sentin hesabatını aparır. Retkliff özü bütün bu addımların məcburiyyətdən atıldığını deyir. Bununla belə, ona da əmindi ki, klubda ştatda olan işçilərin sayı şişiridilib, xərcləri mütləq azaltmaq lazımdı.
“Yunayted”in Avropa Liqasını qazanıb Çempionlar Liqasına yollanması həm də pul mülahizələrinə görə vacib idi. Cari mövsümdə qitənin ən nüfuzlu klub turnirinin əsas mərhələsinə vəsiqə avtomatik iştirakçılara

18,62 milyon avro qazandırıb. Əsas mərhələdə 8 qələbə qazanan, 1-ci yeri tutan komanda xəzinəsinə daha 50 milyon əlavə edə bilərdi. Biz hələ teleyayın hüququnun satışına görə əldə olulnan vəsaiti bura qatmırıq. Növbəti mövsüm qazanc bir qədər də artacaq.