Çempionlar Liqasının arxada qalan qrup mərhələsi bizə bir çox sensasiya və emisional anlar bəxş etdi.

Yəqin ki, qitənin əsas klub turnirinin ən önəmli hadisələrindən biri “Mançester Yunayted”in “Qalatasaray”, “Kopenhagen” və “Bavariya”nın da yer aldığı, heç də ən çətin sayılmayan qrupda sonuncu yeri tutması oldu. Püşkatmadan sonra çoxları güman edirdi ki, “qırmızı şeytanlar”, heç olmasa, 2-ci yeri özünə təmin edəcək, ancaq komanda arxasına bir kisə antirekord almaqla avrokuboklardan biabırçı şəkildə ayrıldı. Xüsusən də Çempionlar Liqasının qrup mərhələsində 15 qol buraxan ilk İngiltərə təmsilçisi olmaq azarkeşləri yandırır. Bəs MY-nin tarixində başqa belə fiaskolar da olub. Əlbəttə, olub və indi onları xatırlamağın vaxtıdı.

Məsələn, Çempionlar Liqasının 2005/06 mövsümündə mankunianlar “Lill”, “Vilyarreal” və “Benfika” ilə eyni qrupda yer almışdı. Təbii ki, buna çətin qrup demək olmazdı. Amma komanda turniri 1 qələbə və 3 heç-heçə ilə tərk etdi. Halbuki heyətdə Rayan Giqqz, Rio Ferdinand, Ruud van Nistelroy, Ueyn Runi, gənc Kriştiano Ronaldo vardı. Bir çox başqa top səviyyəli futbolçu da həmin vaxt “Yunayted”də çıxış edirdi. Qeyd etməyə dəyər ki, “qırmızı şeytanlar” premyer-liqanın həmin mövsümündə “Çelsi”ni özündən irəli buraxmaqla vitse-çempion oldu.

“Mançester Yunayted”in Çempionlar Liqasından Avropa Liqasına “köçdüyü” mövsümləri xatırlamaq da pis olmazdı. Əlbəttə, bu, sarsıdıcı fiasko deyil. Ancaq MY kimi top-klub üçün hətta belə nəticə də uğursuzluq sayılır və vəziyyətdən yalnız gücünə görə ikinci olan avroturniri qazanmaqla çıxmaq olar. Beləliklə, mankunianların Avropa Liqasına “uçduğu” mövsümlərin sayı üçdü: 2011/12, 2015/16 və 2020/21. Komanda 2011/12 və 2015/16 mövsümlərində 1/8 finaldan uzağa gedə bilmədisə, 2020/21 mövsümündə finala yüksəldi və dramatik penalti seriyasında “Vilyarreal”a 10:11 uduzdu (əsas vaxt 1:1 bitmişdi).