Avropa Liqasının finalı premyer-liqa klublarının duelinə səhnə oldu.

"Football-plus.az" xəbər verir ki, ''Tottenhem'' Brennan Consonun fasilə ərəfəsində vurduğu qol sayəsində ''Mançester Yunayted''i minimal hesabla məğlub etdi.

Baxmayaraq ki, bu kollektiv topa cəmi 28 faiz sahib oldu, oyunboyu yalnız 115 dəqiq ötürmə verdi və qapıya cəmi 3 zərbə vurdu. Bu, 2009-cu ildən bu yana bütün avrokubok finalçıları arasında ən zəif göstəricidi! London klubu 2008-ci ildən bu yana ilk titulunu qazandısa, eyni zamanda 41 ildən sonra Avropada ilk titula sahib çıxdı.

Bu kollektiv sonuncu dəfə 1984-də UEFA kubokunu qazanmışdı. Ən əsası premyer-liqada mövsümü 17-ci pillədə bitirməsinə baxmayaraq ''Tottenhem'' gələn mövsüm Çempionlar Liqasında çıxış edəcək.

Finaldakı nəticənin ardından bəzi maraqlı faktlar qeydə alınıb. Məsələn, bu zəfərə baxmayaraq istefaya göndəriləcəyi gözlənilən baş məşqçi Angelos Postekoğlunun qeyri-adi bir seriyası davam etdi. Belə ki, o, indiyə qədər çalışdığı klublarda ikinci mövsümdə mütləq titul qazanıb!

Bu hal daha öncə 1997/98-də ''Melburn''da, 2011/12-də ''Brizben Roar''da, 2019-da ''Yokohama Marinos''da və 2022/23-də ''Seltik''də yaşanıb. ''Tottenhem'' bu mövsüm ''Yunayted''i 4-cü dəfə məğlub etdi və tarixdə bunu bacaran ikinci klub oldu. Daha öncə yalnız ''Everton'' bir mövsümdə (1985/86) ''Yunayted''i 4 dəfə yenməyi bacarmışdı.

Ruben Amorimin komandasına gəlincə, manikunianlar mövsümdə 20-ci dəfə məğlub oldular. Bu, 1973/74-dən (22) bu yana komandanın ən pis göstəricisidi. ''Qırmızı şeytanlar''ın avrokubokların finalında məğlubiyyət seriyası isə 4 oyuna çatdı.

Komanda 2009 və 2011-də ÇL-in finalında ''Barselona''ya, 2021-də isə AL-in finalında ''Vilyarreal''a uduzmuşdu.