Avropanın daha bir klub turnirində mövsümə yekun vuruldu. Polşanın Vrotslav şəhərində Konfrans Liqasının finalında ''Betis'' ilə ''Çelsi'' üz-üzə gəldi.

İspaniya təmsilçisi mərakeşli Ezzalzulinin erkən qolu sayəsində fasiləyə üstün yollandı. Amma ikinci hissədə ''Çelsi'' meydanda fırtına əsdirdi. 65-də Entso Fernandes və 70-də Niklas Ceksonun qolları sayəsində oyunun gedişatı 180 dərəcə dəyişdi. London nəhəngi son 10 dəqiqədə Ceydon Sanço və Moyzes Kaysedonun qolları ilə hesabı darmadağın həddinə çatdırdı.

Beləliklə, Entso Mareskanın komandası 4:1 hesablı inamlı qələbə ilə fanatlarını sevindirdi. ''Zadəganlar'' bununla da daha öncə futbol tarixində heç kimin bacarmadığı unikal bir göstəriciyə nail oldular. Belə ki, ''Çelsi'' UEFA bayrağı altında keçirilən 5 ən önəmli klub turnirinin hamısında qalib gələn yeganə kollektivə çevrildi. ''Mavilər'' daha öncə Çempionlar Liqası, Avropa Liqası, Avrupa superkuboku və Kuboklar kubokunu da qazanmağı bacarmışdılar. ''Betis'' isə tarixində ilk avrokuboku qazanmağa yaxın olsa da, məğlubiyyətlə barışmalı oldu. Sevilyalıların bu uğursuzluğu ilə həm də İspaniya klublarının möhtəşəm seriyası qırılmış oldu.

Belə ki, İspaniya təmsilçiləri iştirak etdikləri son 23 avrokubok finalının hamısından qələbə ilə ayrılmışdılar! Düzdü, bu 23 finaldan 4-də iki İspaniya təmsilçisi üz-üzə gəlmişdi.

Sonuncu dəfə İspaniya klubunun finalda başqa ölkə təmsilçisinə uduzmasına 2001-ci ildə rast gəlinmişdi. Həmin vaxt UEFA kubokunun finalında ''Alaves'' ''Liverpul''a, ÇL-in finalında isə ''Valensiya'' penaltilər seriyasında ''Bavariya''ya uduzmuşdu. Bundan başqa 2018/19-dan bu yana ilk dəfə İspaniyanın heç biri klubu avrokubok qazana bilmədi.