“Qarabağ”ın qələbəsinə heç kim şübhə etmir - nəhəng finala 4 saat qaldı
Ölkə kubokunun finalı bu gün ən azı Çempionlar Liqasının həlledici oyunu qədər diqqət mərkəzindədi.
Əlbəttə, gec saatlarda hər kəs ekran arxasına keçib PSJ – “İnter” oyununu izləməyə çalışacaq. Amma 19.00-da başlayacaq “Qarabağ” – “Sabah” oyununu da həvəslə gözləməyə dəyər.
İndiyə qədər verilən açıqlamalardan belə aydın olur ki, Sumqayıtda anşlaq yaşanacaq. Bütün bunlar öz yerində. Sırf oyunun xarakteri ilə bağlı da düşündürücü məqamlar var.
Məsələn, “Sabah” son mövsümdə yalnız Krunoslav Renduliçin rəhbərliyi altında keçirdiyi ilk oyunda “Qarabağ”a uduzub. Vasili Berezutski “sükan arxasına” keçəndən sonra bu komandaların duellərində yalnız heç-heçə qeydə alınıb. Belədə “Qarabağ”ın aşkar favorit olduğunu deyənlərin dəlilləri nədi? Digər bir məqam: “Sabah”ın yalnız qələbə yolu ilə avrokuboklara vəsiqə qazana bilməsi reallığı həlledici rol oynamayacaqmı? Bu suallar ətrafında üç mütəxəssisin, eləcə də menecer Emil Şükürovun və həmkarımız Ceyhun Əliyevin fikrini öyrəndik.
Tərlan Əhmədov:
“Bu oyun yalnız “Qarabağ” və “Sabah” üçün önəm daşımır. “Turan Tovuz” və “Zirə” üçün də böyük əhəmiyyət daşıdığı üçün bizi maraqlı oyun gözləyir. Final oyununda favorit olmur. Təbii ki, “Qarabağ” futbolçularının ustalığına görə “Sabah”ı üstələyir. Amma Bakı təmsilçisinin avrokuboklarda iştirakı üçün qələbə qazanması vacibdi. Bu baxımdan “Sabah” meydana daha motivasiyalı çıxacaq. Buna baxmayaraq, şansların bərabər olduğunu düşünürəm”.
Vaqif Sadıqov:
“Kubokda həmişə şanslar bərabər olur. Baxmayaraq ki, hər komandanın öz üstünlükləri var. Bilirik ki, “Qarabağ”ın öz oyun tərzi var. Çempionluğu bir neçə tur əvvəldən təmin ediblər. Hazırda "qızıl dubl"a imza atmaq istəyirlər. Unutmayaq ki, “Sabah” da ilki gerçəkləşdirmək üçün meydana çıxacaq. Bizi sona qədər gərgin və maraqlı oyun gözləyir. Proqnozlar kağız üzərində qalacaq. “Sabah” motivasiya baxımından üstündü. “Qarabağ” isə təcrübəli komandadı. Fikrimcə, hər iki komandanın futbolçuları bu görüşü səbirsizliklə gözləyir. Güclü qalib gəlsin və Avropada bizi layiqincə təmsil etsin. Hər iki komandaya uğurlar arzulayıram”.
Azər Bağırov:
“Oyun maraqlı olmağına maraqlı olacaq. Düşüncəm odu ki, istər-istəməz “Qarabağ”ın çempion olması, üstün futbol oynaması məsələsi “Sabah”ın da beyninə həkk olunub. Psixoloji durumda bir az sıxıntı ola bilər. Amma ümumi götürəndə şansları 51-in 49-a nisbətində “Qarabağ”ın xeyrinə dəyərləndirirəm. Əlbəttə, “Qarabağ” və “Sabah” diqqətli olmalıdı . Bir səhv oyunun taleyini tam dəyişəcək”.
Emil Şükürov:
“Birmənalı şəkildə “Qarabağ”ı finalın favoriti sayıram. Bu mövsümü də sabit, yüksək səviyyədə keçirən ağdamlılardan fərqli “Sabah” “təlatümlü dəniz”ə bənzəyib. “Qızıl dubl” həmişə mövsümü yüksək notda bitirmək üçün yaxşı motivasiyadı. Digər tərəfdən, bu oyun Berezutski üçün “Sabah”dakı ilk, bəlkə də son mövsümündə nəsə qazanmaq şansıdı. Fikrimcə, “Qarabağ” oyunun taleyini əsas vaxtda həll edəcək”.
Ceyhun Əliyev:
“İstənilən sahədə texniki və fundamental təhlil növləri mövcuddu. Əlbəttə, texniki təhlil aparsaq, Berezutskinin bu mövsüm Qurbanova məğlub olmaması nəhəng məqam kimi qabardıla bilər. Ancaq məsələ burasındadı ki, çempionatda şəxsi görüşlərdə hansısa komandadan üstün olmaq hədəfi heç kimin qarşısına qoyulmur. Elə həmin Berezutskini dindirsəz, bütün görüşlərdə “Qarabağ”a məğlub olmağı, lakin medalçılar sırasına düşməyi üstün tutar. Kubokdə isə fərqli durumdu. Burda hər mərhələ bir finaldı. O başqa məsələ ki, motivasiya baxımından“Qarabağ”ın futbolçuları “titul acı” deyillər və bu baxımdan “Sabah” daha acdı. Üstəlik tərəzidə Avropa Liqasına vəsiqə dayanıb. Və burda da bu tərəzidə yalnız “Sabah” var. Bütün dediklərimə baxmayaraq, hesab edirəm ki, ağdamlılar cütün favoritidi”.
MÜZƏFFƏR QULUZADƏ
Digər xəbərlər
