Yığmamız Millətlər Liqasının C liqasının 4-cü qrupu çərçivəsində Litva ilə keçirdiyi ev oyununda darmadağın oldu - 0:5.

“Football-plus.az” xəbər verir ki, oyunsonrası mətbuat konfransında yığmanın baş məşqçisi Siyasət Əsgərov görüş haqda fikirlərini bildirib.

- İlk dəfə görürəm ki, ölkəmizdə mətbuat konfransı olur. Bugünkü mənzərədən sonra belə qarşılanma üzücüdü. Çox səhvlərimiz oldu. İlk dəqiqələrdə buraxdığımız qollarla komandada eniş oldu. Oyun planımızdan çıxdıq. İlk hissədə səhvlərə yol verdik. İkinci hissədə sistemdə fərqlilik etdik. Önə atılırsansa, arxada boşluqlar olur. O boşluqdan da növbəti qolu buraxdıq. Bu məğlubiyyətin əsas səbəbkarı mənəm. Komandaya da bunu dedim. Belə məğlubiyyət olmamalıydı. Bu rəqib Almaniya, İspaniya deyil. Onları səfərdə məğlub etmişdik. Komanda rəqibə yuxarıdan aşağı baxdı. Tribunadan oyunu izləyənlərə təşəkkür edir və məğlubiyyətə görə üzr istəyirəm.

- Siz nədə səhv etdiz ki, böyükhesablı məğlubiyyət yaşandı?
- Üçlü qrupda qərarlaşmışıq. Monteneqro vurduğu topa görə bizdən üstün idi. İlk dəfə idi ki, 5-3-2 sistemi ilə başladıq. Bacara bildiyimiz qədər qol vurmaq istədik. Öndə çoxalan zaman cinahlarda boşluqlar oldu. Rəqib səhvlərimizdən yararlandı. Üç mərkəz müdafiəçisi ilə oynadıq. Onların hücumçuları bizi üstələdi.

- Nazlıcanla, Bakaranadzenin yoxluğu, Aytacın ehtiyatda qalması nə ilə bağlı idi?
- Nazlıcan sarı vərəqə limitini doldurmuşdu. Bakaranadze əməliyyat olub. Aytac zədədən qayıdıb. Aytac tam hazır deyildi. Nərgiz son oyunlarda yaxşı çıxış edirdi. Nərgizlə davam etdik.

- Federasiya rəhbərliyi maddi cəhətdən motivasiya etmişdi?
- Oyundan öncə də demişdim ki, yeganə oyundu tribunada azarkeşlər var. Biz göldə boğulduq. Oyunu udasan ki, mükafat alasan. Bu məğlubiyyətdən sonra rəhbərliyin önünə çıxmağa utanırıq. Rəhbərlik tərəfindən qadın futboluna dəstək var. Qələbə qazansaydıq, qarşılığı olardı.

- Aysun Seydiyeva niyə karyerasını bitirdi?
- Aysun Seydiyevanı futbola mən qaytarmışam. Bu onun şəxsi fikridi. Onun qərarına hörmətlə yanaşırıq.

- Qazonun süni olması nə dərəcədə təsir göstərdi?
- Əslində biz süni qazon istəmirdik. Hücumçumuzun qaçmasında problem olurdu.

- Gələcək taleyiniz barədə düşüncəniz necədi?
- Rəhbərliklə görüşümüz olacaq. Bu hesabdan sonra rəhbərliyin mənə sualları olacaq. Litvada da məğlub olsaydıq, başa düşmək olardı. Bir məğlubiyyətlə buranı buraxacağıqsa, özümüzə hər dəfə yer axtaraq. Önəmli olan bugünkü səhvləri görməkdi. Bu məğlubiyyətlər davam edərsə, gedərəm. Bu qədər gözəl işlər görüb, getmək doğru olmaz. Hamı məğlub ola bilər. Məğlubiyyət məni çox üzdü. Belə olan halda şanslarımız da çətin duruma düşdü. Monteneqro rəqibi udacağı halda pley-off şansımız qalır. Son oyunu izləyəcəyik.

- Sizi burda oynamağa nə məcbur etdi?
- İnsanların bura gəlməsi üçün bütün sosial şəbəkələrdə paylaşım etmişdik. Məqsəd stadionu doldurmaq idi. Ona görə buranı seçdik.

- Bir neçə həftə əvvəl millidən 4 futbolçu Media Liqada iştirak etdi. Onların orda oynaması hazırlığa təsir edə bilər?
- Reklam xarakteri daşıyırdı. Qızlar 5-7 dəqiqə futbol oynayırdı. Kişi futbolçu Fidanın ayağını tapdalamışdı. Qız da ağlamışdı. Bunu da kimsə paylaşmışdı. Qadınların ora gəlməsi şounun bir növü idi. Orda iştirak edənlərin özləri də paylaşırdı ki, bu matça gəlin.

- Fidanı meydana buraxacağınızı gözləyirdik…
- Ümumiyyətlə zədəsi yoxdu. Fidan məşqdə də iştirak etdi.

- “Neftçi” ilə çempion olduz. Orda hazırlıq necə gedir?
- Ayın 24-də püşk atılacaq. Rəhbərliyin mənlə davam edib-etməyəcəyini bilmirəm. Çempionlar Liqasında yaxşı çıxış etmədik. Bu il reytinqimiz olmadığına görə 1-ci mərhələdən başlayacağıq. Orda da çətin rəqiblər olacaq. Şans üzümüzə gülsə, 1-ci mərhələni adlaya bilərik. Məqsədimiz ölkəmizə reytinq xalı qazandırmaqdı.

ƏSƏD SEYİDOV